Ձեր վստահելի աղբյուրը

«Մենք ունենք սերունդներ դաստիարակելու խնդիր, մենք ունենք մեր ավանդույթները, մեր պատմությունը պահպանելու, միևնույն ժամանակ՝ աշխարհի համար ընկալելի քաղաքացի լինելու խնդիր։ Մենք ունենք խնդիր, որ մեր երիտասարդ սերունդը լինի ժամանակակից: Դա չի նշանակում, որ մեր հայությունը, մեր ավանդապաշտությունը, մեր ընտանիքի մշակույթը պետք է կորցնենք»,-այսօր նախընտրական քարոզարշավի շրջանակում Նոր Նորք վարչական շրջանի բնակչության հետ   կայացած  հանդիպմանը ասաց ՀՀԿ նախագահի առաջին տեղակալ, ՀՀ վարչապետ Կարեն Կարապետյանը։

«Իմ պատեկարցմամբ՝ շատ դեպքերում մշակույթի ոլորտում ունենք արհեստական կոնֆլիկտներ։ Մենք կարող ենք մերժել ամեն ինչ, ասել՝ «չէ, մերն ուրիշ է», և մյուս կողմից էլ մերը մատուցելու համար որևէ քայլ չձեռնարկենք։ Այս առումով բավականին շատ անելիքներ ունենք։ Մենք հին և աշխարհի քաղաքակրթության մեջ դերակատարում ունեցող ազգ ենք, բայց դրա մասին մենակ մենք գիտենք և միայն նրանք, ովքեր մասնագիտորեն առնչվում են դրա հետ։ Աշխարհին մերը ճանաչելի դարձնելու առումով շատ անելիքներ ունենք»,- ասաց Կարեն Կարապետյանը։

Հանդիպմանը ներկա քաղաքացիներից մեկը հարց, ապա խնդրանք ուղղեց վարչապետին. «Հայ ազգի կանանց և աղջիկների 80 տոկոսից ավելին ձեզ համակրում են, ոնց է լինելու վերջը։ Եվ, լինելով մանկավարժական համայնքի ներկայացուցիչ, ունեմ մեկ խնդրանք՝ այնպես անել, որ մանկավարժի դերը նորից բարձրանա հայ ազգի մեջ»։

Կարեն Կարապետյանը հարցին պատասխանեց. «Վերջը լավ է լինելու, ես էլ գնալու եմ մեր տուն»։

Ինչ վերաբերում է խնդրանքին՝  նա նշեց, որ դա չափազանց կարևոր խնդիր է և մի քանի թեզերի շուրջ պետք է կառուցվի պատասխանը. «Մենք ռեալ շանս ունենք ժամանակակից, զարգացած, բարվոք, բարեկեցիկ երկրի, այս երկիրը ստանալու համար մենք շանս չունենք խելոք չլինելու։ Խելոք լինելու համար պետք է կրթվել, կրթվելու համար պետք է ուսուցիչ ունենալ, իսկ ուսուցչի դարդ ու ցավը քիչ պետք է լինի, որ կարողանա իր ունեցածը փոխանցի։

Շատ լավ գիտակցում ենք, որ այսօր ոչ միայն ուսուցիչների, այլև մեր բոլոր հայրենակիցներին սոցիալական առումով, աշխատավարձերի առումով, թոշակի առումով, կողքը լինելու առումով չենք անում այն, ինչ պետք է անենք։ Չենք անում ոչ թե նրա համար, որ չենք ուզում կամ չենք հասկանում, այլ զուտ՝ անում ենք այնքան, ինչքան մեր երկրի կարողությունը թույլ է տալիս։

Իսկ տնտեսությունը կամաց-կամաց պետք է թափ հավաքի: Դրա համար բավականին ժամանակ ու ջանք է պահանջվում։ Մենք պետք է գիտակցենք, որ մեկ օրում բոլոր խնդիրները չեն լուծվում։ Բայց մենք գիտենք ոնց փոխել, մենք գիտենք ոնց կյանքը լավացնել և հստակ այդ ուղղությամբ գնալու ենք»։

Մեկ այլ քաղաքացի հարց ուղղեց, թե՝ կառավարությունն ինչ քայլեր է ձեռնարկում ներդրումների հոսքն ավելացնու համար։

Կարեն Կարապետյանը պատասխանեց՝ շարժիչ ուժերից մեկը գործարար աշխարհն է։ 

«Աշխարհի կայացած երկրներում, որոնց օրինակը կարող է մեզ համար հետաքրքիր լինել, բիզնեսին չեն խանգարում։ Որպեսզի ներդրումային ծրագրերը գան, օրենքներ պետք է լինեն, պետական խոչընդոտները պետք է մինիմալի բերվեն, դատարանը պետք է աշխատի, լիցենզիաների քանակը պետք մինիմում լինի, պետական ծառայողի հետ շփումը պետք է մինիմում լինի»,- բացատրեց վարչապետը։

Նրա խոսքով՝ ներդրումներ ներգրավելուն խանգարում է այն կարծրատիպը, որ Հայաստանում ներդրում կատարելը, լրացուցիչ եկամուտ ստանալը խնդրահարույց է։

«Մենք հստակ ձևակերպել ու  ներկայացրել ենք, որ այս տարի մեկնարկելու է 3,2 մլրդ դոլարի ներդրումային ծրագիր։ Ամեն ինչ պետք է անենք, որ բիզնես-միջավայրը ներդրողի համար լինի հասկանալի, ռիսկայնությունը մեր երկրում պակասի»,-հավելեց ՀՀԿ նախագահի առաջին տեղակալը։

Կարեն Կարապետյանն անդրադարձավ նաև Ջրառատի դեպքերին. «Անթույլատրելի բան է, զենքով մարդը կենցաղում վտանգ է ներկայացնում քաղաքացուն։ Շատ հետևողական պետք է բոլոր այդ դեպքերը քննենք, մինչև վերջ բերենք, հասցնենք և մեղավորներին պատժենք»։

Իր խոսքի ավարտին վարչապետը ասաց. «Ժպտացեք, տրամադրություններդ փոխեք, մենք ունենք շանս ֆանտաստիկ երկիր ունենալու»։