Ձեր վստահելի աղբյուրը

Հայաստանի կոմունիստական կուսակցությունից ԱԺ պատգամավորի թեկնածու առաջադրված Իրինա Հովակիմյանն այսօր լրագրողների հետ հանդիպմանն ասաց, որ մեծ ոգևորությամբ է մասնակցում ընտրություններին։

«Կոմունիստական ոգով եմ դաստիարակվել և առ այսօր հավատարիմ եմ այդ սկզբունքներին։ Խորհրդարան մտնելուց հետո պետք է զարկ տանք ռազմական գիտությանն ու արդյունաբերությանը,-ասաց նա:

Լրագրողների հետաքրքրվեցին, թե կումկուսը որ քաղաքական ուժին է մրցակից տեսնում, ինչին նա պատասխանեց. «Մրցակից եմ տեսնում մեր առաջադեմ կուսակցություններից՝ ՀՀԿ, ԲՀԿ»։

Հայաստանի կոմունիստական կուսակցությունից պատգամավորի թեկնածու Ռուբեն Բալաբանյանը, ով խորհրդային տարիներին դատավոր է աշխատել, խորհրդարանում հայտնվելուց հետո պատրաստվում է լրացնել օրենսդրական բացերը:

«Օրենսդրության մեջ բացեր կան: Օրինակ, որ ասվում է՝ դատարանը գործը պետք է քննի ողջամիտ ժամկետում: Ողջամիտ ժամկետ հասկացությունը յուրաքանչյուր դատարան յուրովի է գնահատում, ինչը սխալ է»,-ասաց պատգամավորի թեկնածուն:

Նա նշեց, որ Կոմկուսի անդամ է 23 տարեկանից։

Լրագրողների դիտարկմանը՝ թե ինչ են անելու ՀԿԿ գործազուրկ, թոշակառու թեկնածուները ԱԺ-ում, Իրինա Հովակիմյանն ասաց.  «Եկեք հարցին ավելի ճիշտ մոտենանք, Թրամփը, որ դարձավ ԱՄՆ նախագահ այդ տարիքում, հիմա ԱԺ մտնելն այդ տարիքում այդ ինչ մի մեծ պրոբլեմ է, բոլորն էլ գիտակից մարդիկ են, գիտեն մտածել, խոսել, օգնել մյուսներին»: