Ձեր վստահելի աղբյուրը

Ռուսաստանից վերջին անգամ Հայաստան թռչնամիս ներկրվել է երեկ Սարատովից: Այս տարվա ընթացքում Մերձմոսկվայից Հայաստան թռչնամիս չի ներկրվել: Panorama.am-ի հետ զրույցում հայտնեց ԳՆ ՍԱՊԾ Անասնաբուժության տեսչություն պետ Հովհաննես Մկրտչյանը:

Հիշեցնենք, ռուսական լրատվամիջոցները գրել էին,  որ Մոսկվայի մարզում թռչնագրիպի բռնկում է արձանագրվել:

Այս պահի դրությամբ այդ մարզից Հայաստան թռչնամիս ներկրելն արգելված չէ: Մկրտչյանի խոսքով, մինչ նման որոշում կայացնելիս հաշվի են առնում մի շարք հանգանամանքներ՝ դեպքերի թիվը, միմյանց շաղկապված լինելը, վարակված թռչունն ընտանի՞ է, թե՞ վայրի և այլն:

«Ռիսկերի գնահատման մեխանիզմներ կան: Ես էլ որպես Առողջապահության համաշխարհային կազմակերպության պատվիրակ անմիջապես ստանում եմ տեղեկատվություն: Արգելք կիրառվում է այն դեպքում, երբ ռիսկը մեծ է, որ վարակը կներթափանցի մեր երկիր»,-ասաց տեսչության պետը:

Այս պահին Հայաստանը թռչնագրիպի հետևանքով թռչնամիս,  բոլոր տեսակի թռչնամթերքի, հումքի (փետուր, աղվամազ), ապրանքային և ինկուբացիոն ձվի ներկրում Հայաստան արգելված է Գերմանիայից, Մեծ Բրիտանիայից, Նիդերլանդներից, Լեհաստանից, Ուկրաինայի երկու մարզից, Թուրքիայից, Չինաստանից, Պարսկաստանի 11 նահանգներից:

Մկրտչյանի խոսքով, Հայաստանը հիմնականում թռչնամիս ներկրում է ԱՄՆ-ից, տարեկան մոտ 30 հազար տոննայի չափով: