Ձեր վստահելի աղբյուրը

Ջրառատում տեղի ունեցածն ամենթողության հետևանք է: «Էրեբունի» հիվանդանոցում նման կարծիք հայտնեց Էլինար Վարդանյանը, ով պատգամավորության թեկնածու է առաջդրված ՕՐՕ դաշինքի կողմից:

«Երբ երկու օր առաջ տեղի ունեցած իրադարձությանը տրվում է միակողմանի գնահատական, հետևանքը լինում է այսպիսին: Այսինքն, հասկանում են, որ իրենց ամեն ինչ կարելի է»,-ասաց գործող պատգամավորը:

Նրա խոսքով, գյուղացիներն իրենց պատմել են, որ այս ամենին ականատես են եղել ոստիկանները, սակայն միջամտել են ու վնասազերծել կրակոցից հետո:

Նույն դաշինքի կողմից առաջադրված Ստեփան Մարգարյանն էլ նույն համոզման է.
«Ջրառատում տեղի ունեցածից հետո իշխանությունների կողմից հետևություններ չանելու հետևանք է: Ըստ գյուղացիների, այսօր էլ միջադեպին մասնակցել են Երանոսյանների ազգակիցները»:

Բժշկական կենտրոնում գտնվող փաստաբան Ինեսա Պետրոսյանն էլ լրագրողների հետ զրույցում ասաց, որ տուժածներից Մելիք Մելքոնյանը, Հակոբ Մելքոնյանը վիրահատարանում են: Երեք տուժածներն էլ Մելքոնյան ընտանիքի անդամներ են՝ Հակոբ Մելքոնյանը, նրա որդին ու եղբայրը:

«Հակոբ Մելքոնյանը ոտքի շրջանում ունի հրազենային վնասվածք,  գլխի շրջանում էլ ունի վնասվածք, հավանաբար դա դանակով է տեղի ունեցել, երեխայի ձեռքն են կոտրել լոմով: Կարծես թե պետք է վիրահատվի»,-ասաց նա, ավելացնելով, որ Հակոբ Մելքոնյանը նախկինում պայքարել է գյուղապետ դառնալու համար: