Ձեր վստահելի աղբյուրը

Արմավիրի մարզի Ջրառատ գյուղում տեղի ունեցած միջադեպի առթիվ քրեական գործ է հարուցվել: Քննչական կոմիտեից Panorama.am-ին հայտնեցին, որ գործ է հարուցվել Քրեական օրենսգրքի 112 հոդվածի, 258 հոդվածի 4-րդ մասի և 235 հոդվածի հատկանիշներով:

Քրեական օրենսգրքի 112 հոդվածը սահմանում է. «Դիտավորությամբ մեկ ուրիշին մարմնական վնասվածք պատճառելը կամ առողջությանն այլ ծանր վնաս պատճառելը, որը վտանգավոր է կյանքի համար կամ առաջացրել է տեսողության, խոսքի, լսողության կամ որեւէ օրգանի կամ օրգանի ֆունկցիայի կորուստ կամ արտահայտվել է դեմքի անջնջելի այլանդակմամբ, ինչպես նաեւ կյանքի համար վտանգավոր այլ վնաս է պատճառել առողջությանը կամ առաջացրել է դրա քայքայում՝ զուգորդված ընդհանուր աշխատունակության ոչ պակաս, քան մեկ երրորդի կայուն կորստով կամ հանցավորի համար ակնհայտ մասնագիտական աշխատունակության լրիվ կորստով կամ առաջացրել է հղիության ընդհատում, հոգեկան հիվանդություն, թմրամոլությամբ կամ թունամոլությամբ հիվանդացում  պատժվում է ազատազրկմամբ՝ երեքից յոթ տարի ժամկետով»:

258 հոդվածի 4-րդ մասը սահմանում է. «Խուլիգանությունը՝ դիտավորությամբ հասարակական կարգը կոպիտ կերպով խախտելը, որը կատարվել է զենքի կամ որպես զենք օգտագործվող առարկաների գործադրմամբ՝ պատժվում է ազատազրկմամբ՝ չորսից յոթ տարի ժամկետով»:
235 հոդվածը վերաբերում է   ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելուն, իրացնելուն, պահելուն, փոխադրելուն կամ կրելուն: