Ձեր վստահելի աղբյուրը

Մեկնարկել է Զարուհի Փոստանջյանի նոր քաղաքական պլատֆորմի հիմնադիր համագումարը, որի ժամանակ հայտարարվեց  «Երկիր ծիրանի» քաղաքական կուսակցության ստեղծման մասին:

Ինչո՞ւ «Երկիր ծիրանի»: Բացատրեց Զարուհի Փոստանջյանը. «Մենք խնդիր ունենք համախմբելու հայությանը և վերադառանալու մեր ակունքներին: Մեր երկրի անվանումը ծիրանի է, և այս ծառը և նրա տված պտուղը նույնքան կատարյալ է, ինչպես մեր հայրենիքը: Ծիրանը միակ պտուղն է, որը հավասարապես բաժանվում է երկու մասին: Եթե հավասարապես բաժանվում է երկու մասի, այն  նաև արդարության նշան է: Խորհրդանշական է նաև ծիրանի գույնը: Մեր թագավորների գույնն է եղել: Այս ամենը գիտակցելով՝ մենք ընտրեցինք այս անվանումը և ուզում ենք, որ սա լինի մեր բոլորի ծիրանին, մեր բոլորի հայրենիքը, քաղաքական հարթակը, որտեղ կարողանանք մեր քաղաքական մտքրեն արտահայտենք, վերջիվերջո դառնանք քաղաքական ազգ: Եթե չենք դառնալու քաղաքական ազգ, ապա լուրջ պետություն չենք կարող կառուցել»:
«Ժառանգություն» կուսակցության նախկին անդամ, պատգամավոր, կուսակցության հիմնադիր անդամ Զարուհի Փոստանջյանը հայտարարեց, որ իրենց նախաձեռնող խումբը Հայաստանի Հանրապետությունից, նաև  ՀՀ-ից դուրս բնակվող  մտահոգ քաղաքացիներն են, ովքեր հասկանում են, որ եթե պետության ներսում ցանկանում են հաստատել արդարություն, պետք է դրան հասնել քաղաքական իրավունքների լիարժեք իրացմամբ:

«Այս 25 տարիների ընթացքում մեր քաղաքական իրավունքները մեզանից օտարել են՝ ամեն օր, անընդհատ, այս պահին էլ օտարում են: Դուք բոլորդ էլ տեսնում եք, թե ինչպես է տեղի ունենում այսպես կոչված ընտրություններ-միջոցառումը, տեսնում եք, թե ովքեր են մասնակիցներն այդ միջոցառման, և մենք տեսնելու ենք նաև ապրիլի 3-ը, թե ինչ է տեղի ունենալու:

Մենք չենք պատրաստվում լքել Հայաստանը, դեռ ավելին՝ պատրաստվում ենք այնպես անել, որպեսզի մեր հայրենակիցները, ովքեր այս պահին ստիպված, պարտադրված գտնվում են Հայաստանի սահմաններից դուրս, վերադառնան, զբաղվեն քաղաքականությամբ: Մեր քաղաքական պլատֆորամը դրան է ուղղված»,- ասաց Զ.Փոստանջյանը:

Նրա խոսքով, կան ՀՀ քաղաքացիներ, ովքեր ստիպված  ապրում են արտասահմանում, բայց ցանկություն ունեն մասնակցել Հայաստանում տեղի ունեցող քաղաքական կյանքին, նրանց առջև կան արգելքներ:

«Այս քաղաքական պլատֆորմը հիմք է ստեղծելու,  որպեսզի մեր հայրենակիցները, ովքեր այս պահին գտնվում են արտասահմանում, ունեն կամ չունեն քաղաքացիություն, ունեն երկքաղաքացիություն,  մասնակցեն Հայաստանում քաղաքական կյանքին, ընտրեն և ընտրվեն ընտրովի պաշտոններում, բարձրաստիճան պաշտոններում, լինեն պատգամավորներ, քաղաքապետեր, վարչապետեր: Մենք դրա կարիքը ունենք: Եթե մենք չենք օգտագործելու մեր մարդկային կապիտալը, որն ամենաարժեքավորն է, չենք դառնալու անդրսահմանային քաղաքական ազգ,  չենք կարողանալու ճեղքել այն ճգնաժամը, որն այսօր առկա է մեր կյանքում»,- ասաց նա:

Զ. Փոստանջյանն ասաց, որ քաղաքական ծրագրի հիմքում դրված է առկա, ժամանակակից քաղաքական, գիտական միտքը, իսկ իրենց հռչակագիրը միտված է հայ ժողովրդի համախմբմանը:
Քաղաքական ուժի կարգախոսն է լինելու  «Դեպի Արարատ»:

«Մենք գործունեություն ենք տանելու բոլոր ոլորտներում, մասնակիցն ենք լինելու բոլոր քաղաքական գործընթացներին»,- նշեց Զարուհի Փոստանջյանը: