Պուտինը համոզմունք է հայտնել, որ Հայաստանը սահմանդրական փոփոխությունների հետ կապված փուլը հաջողությամբ կանցնի

Քաղաքական 15:46 15/03/2017

Պուտինը համոզմունք է հայտնել, որ Հայաստանը սահմանդրական փոփոխությունների հետ կապված փուլը հաջողությամբ կանցնի

Մոսկվայում ավարտվել է Ռուսաստանի նախագահ Վլադիմիր Պուտինի ու Հայաստանի նախագահ Սերժ Սարգսյանի հանդիպումը:

«Kremlin.ru»-ի փոխանցմամբ, հանդիպմանը քննարկվել են մասնավորապես երկու երկրների համագործակցության վերաբերյալ առանցքային հարցեր, Եվրասիական տարածքում ինտեգրացիոն համագործակցության զարգացման հեռանկարները:

«Ապրիլի 3-ին մենք նշելու ենք մեր երկրների միջև դիվանագիտական հարաբերությունների հաստման 25-ամյակը: Այս տարիներին Հայաստանի ու Ռուսաստանի հարաբերությունները կրել են դաշնակցային բնույթ: Մենք ակտիվորեն համագործակցում ենք պրակտիկորեն բոլոր ուղղություններով միջազգային կազմակերպություններում, այդ թվում նաև այն կազմակերպությունների, որոնք ստեղծվել են հետխորհրդային տարածքում, ինչպես նաև միջազգային կազմակերպություններում»,-ասել է ՌԴ նախագահը:

Պուտինի խոսքով, երկու երկրների հարաբերություններն այժմ էլ զարգացման փուլում են:

«Մենք գիտենք, որ մեր հանդիպումը կայանում է Հայաստանում խոշոր ներքաղաքական իրադարձության նախապատրաստման նախաշեմին: Ապրիլի 2-ին Հայաստանում խորհրդարանական ընտրություններ են նշանակված, ԱԺ ընտրությունը կապված է սահմանադրական փոփոխությունների հետ: Գործընթացը հեշտ չէ, բայց վստահ եմ, որ Հայաստանը Ձեր ղեկավարությամբ կհաղթահարի իր զարգացման այս փուլը: Մենք անկեղծորեն ձեզ մաղթում ենք հաջողություններ»,-ասել է ՌԴ նախագահը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: