Ձեր վստահելի աղբյուրը

ՀՀ տնտեսական զարգացման և ներդրումների նախարարությունը  շուրջ 160 ներդրումային ծրագիր է ստացել՝ կառավարության հայտարարությունից ի վեր: Դրանք ուսումնասիրվել են, մշակվել, առանձնացվել են առավել իրատեսականներն ու օտարերկրյա ներդրողների տեսանկյունից հետաքրքրականները:

Panorama.am-ի թղթակցի հետ զրույցում ՀՀ տնտեսական զարգացման և ներդրումների նախարարության ներդրումային ծրագրի բաժնի պետ Արամ Վարդանյանն ասաց, որ օտարերկրյա ներդրողների ուշադրությունը գրավելու նպատակով նախարարությունը ստեղծել է էլեկտրոնային հարթակ՝ InvestmentProjects.am, որտեղ էլ զետեղել են ներդրումային ծրագրերը:

Նրա խոսքերով՝  այս պահին կայքում տեղադրված է 36 ծրագիր: Արամ Վարդանյանը նշեց, որ կայքը յուրատեսակ կամուրջ է ՝ ներդրողների ու ներդրումներ փնտրողների միջև:

«Մինչ այս էլեկտրոնային հարթակի ներդրումը, ներդրումային ծրագրերը ներդրողներին էին ներկայացվում դիվանագիտական խողովակների միջոցով, տարբեր գործարար համաժողովների ընթացքում: Դա աշխատատար ու շատ ժամանակ ոչ այդքան հասցեական մոտեցում էր, քանի որ նման գործարար միջոցառումներին հայտնի չէր, թե ինչ ներդրողներ կլինեն, ինչով նրանք կհետաքրքրվեն: Այժմ ցանկացած ներդրող կարող է մտնել կայք ու իրեն հետաքրքրող ծրագիրն  այնտեղ գտնել»,- նշեց նախարարության ներդրումային ծրագրի բաժնի պետը` հավելելով, որ կայքը ներկայումս հասանելի է անգլերենով, ժամանակի ընթացքում կլինեն նաև հայերեն և ռուսերեն տարբերակները: 

Ներկա փուլում բոլոր ծրագրերը  կենտրոնացված չեն միայն Երևանում: Մասնավորապես,  8 ծրագիր մարզերից են, որոնք ներկայացնում են տարբեր ոլորտներ՝ գյուղատնտեսություն, արդյունաբերություն, քաղաքաշինություն, կապ, տեղեկատվական տեխնոլոգիաներ,  զբոսաշրջություն:

Արամ Վարդանյանը նշեց, որ առավել խոշոր ներդրումային ծրագրերը, որոնք ունեն հիմնավոր բիզնես պլաններ, հաշվարկներ, լրամշակումից  հետո տեղադրվում են կայքում: Ավելի փոքր ծավալի ներդրումային ծրագրերի համար, որոնք  հիմնականում մարզերից են ստացված և գյուղատնտեսության ոլորտին են վերաբերում,  իրագործման այլ ճանապարհ է ընտրվել:

Մասնավորապես, վարչապետի գլխավորությամբ իրականացվում են հավաքագրված ծրագրերի քննարկումներ. մինչ օրս ստացել են մոտ 70-80 փոքր ներդրումային ծրագիր,  որոնցից  հավանության է արժանացել  50-60-ը: Արամ Վարդանյանի խոսքերով՝ ոչ բոլոր ծրագրեր են  ֆինանսական ներդրումներ պահանջում, կան ծրագրեր, որոնք մաքսային, հարկային արտոնությունների տրամադրման, մաքսատուրքից ազատման և ԱԱՀ երեք տարով հետաձգման վերաբերյալ են: Որոշ ծրագրեր էլ  պետություն-մասնավոր հատված ձևաչափ են պահանջում, որը ենթադրում է հողի նշանակության փոփոխություն կամ փոփոխության արդյունքում վճարվելիք գումարների հետաձգում: Բացի այդ, կան գյուղատնտեսության զարգացմանն ուղղված ծրագրեր, որոնց համար պահանջվում է 10-50 մլն դրամի ներդրում: Այդ գումարը կտրամադրի կառավարությունը:

«Այս ծրագրերը քննարկելուց հետո ՓՄՁ ԶԱԿ-ի և ՓՄՁ ՈՒՎԿ-ի աջակցությամբ՝ ֆինանսական ու այլ գործիքակազմի միջոցով, վարկային միջոցներ կտրամադրվեն դրանց իրականացման համար: Այսինքն՝ ՓՄՁ ԶԱԿ-ն օգնում է, օրինակ, լրամշակել բիզնես ծրագիրը, եթե գրավի առարկա չունեն, աջակցում են, երաշխավորում, որ ՈՒՎԿ-ն վարկային ռեսուրսներ տրամադրի»,- ասաց Արամ Վարդանյանը:

Ըստ նրա՝  առաջին փուլով 13 ընկերության ծրագիր քննարկվել է վարչապետի մոտ, դրանք  հավանության են արժանացել, աջակցության տրամադրումը վերջնական փուլում է:

Ինչ վերաբերում է խոշոր ծրագրերին, Արամ Վարդանյանը նշեց, որ դրանք իրատեսական ծրագրեր են:  36 ծրագիրը, ըստ նրա, ընդհանուր առմամբ պահանջում է  շուրջ 1,5 մլրդ դոլար:

Որոշ ներդրողներ արդեն հետաքրքրված են այդ ծրագրերով: Ըստ բաժնի պետի՝   շուրջ 10-15 հարցում տարբեր ծրագրերի մասով ստացել են, մասնավորապես, 3 հարցումը ստացել են Եվրոպայից,  5-ը՝  ԱՄՆ-ից,  մնացածը՝ տեղական գործարարներից:

«Շատ դեպքերում ներդրողներին հետաքրքրում է ծրագրի ավելի ընդլայնված տարբերակը, քանի որ մենք հաճախ շատ մանրամասներ չենք տեղադրում կայքում՝ ելնելով բիզնեսի գաղտնիության սկզբունքից: Մենք կապ ենք հաստատում, հուզող հարցերին փորձում են ծրագրի հեղինակները պատասխանել»,- ասաց Արամ Վարդանյանը:

Նա  վստահ է՝ ծրագրերը լուրջ խթան կհանդիսանան տնտեսության զարգացման համար: Մասնավորապես, Արամ Վարդանյանը առանձնացրեց Սյունիքի մարզի Ագարակ քաղաքում՝ Իրանի սահմանակից տարածքում ազատ տնտեսական գոտու հիմնումը:  ԱՏԳ-ն զբաղեցնելու է 10-15 հա տարածք, սակայն առկա է 35 և հավելյալ 10 հա տարածքով ընդլայնման հնարավորություն: Ծրագրի արժեքը գնահատվել է շուրջ 28 մլն դոլար, սկզբնական շրջանում  կստեղծվի 60-70 աշխատատեղ, իսկ հետագայում՝   2500-ից ավելի աշխատատեղ:

Նրա խոսքերով՝ կանխատեսումներ են իրականացվել, որ 10 տարիների ընթացքում ԱՏԳ-ում գործունեություն  կծավալի 100 ընկերություն, որոնք տարեկան կարտահանեն 80-100 մլն ԱՄՆ դոլարի ապրանքներ: Արտահանման համար թիրախային երկրներ նախանշվել են Իրանը, ԵԱՏՄ անդամ, Մերձավոր Արևելքի անդամ երկրները:

Արամ Վարդանյանը առանձնացրեց Ենոքավանի զբոսաշրջային ծրագիրը, որն իր մեջ ներառում է հինգ ծրագիր՝  հյուրանոցների, ճոպանուղու ստեղծում:

Ներդրումային խոշոր ծրագրերից  է  Քաղաքաշինության պետական կոմիտեի մշակած «Նոյ» ազգագրական թաղամասի կառուցապատման ծրագիրը, որով  նախատեսվում է Դալմայի այգիներին հարող տարածքում կառուցել նոր թաղամաս: Ներդրման ծավալը կկազմի  98 մլն դոլար: Ըստ նախագծի՝  թաղամասում կլինեն 2-3 հարկանի բնակելի շենքեր, հյուրանոցներ և այլն: