«Եվրատեսիլ»-ի կազմակերպիչները Կիևին հիշեցրել են իր պարտավորությունների մասին

Հասարակություն 15:00 15/03/2017 Աշխարհում

Ուկրաինայի, որպես «Եվրատեսիլ-2017»-ն ընդունող երկրի, պարտականությունների մեջ է մտնում մրցույթի բոլոր մասնակիցների անվտանգության ապահովումը: rg.ru-ի հաղորդմամբ, մրցույթի կազմակերպիչ Եվրոպայի հեռարձակողների միությունը համոզել է Կիևին հանել ՌԴ-ն ներկայացնող Յուլյա Սամոյլովային բոլոր արգելող ցանկերից:

Ուկրաինայի իշխանություննները ռուսաստանցի մասնակցի ելույթն արգելելու մտադրության մասին հայտարարել էին անմիջապես այն բանից հետո, երբ ստացել էին մրցույթն անցկացնելու իրավունքը: Հենց այդ ժամանակ էլ ԵՀՄ-ն նրանց հիշեցրել էր իրենց պարտականությունների մասին: Միության և Կիևի միջև վեճը նոր զարգացում է ստացել, երբ հայտնի է դարձել Ռուսաստանի ներկայացուցչի անունը, Ուկրաինան սպառնացել է թույլ չտալ նրա մուտքը:

«Իզվեստիա» թերթի տվյալներով, բանակցությունների արդյունքում միությունը Կիևին համոզել է հանելու Յուլյա Սամոյլովային բոլոր սև ցուցակներից, որոնք կարող են խոչընդոտել նրա մասնակցությունը մրցույթին:

«Կիևի հետ շատ արդյունավետ բանակցություններ ենք վարում դեռևս անցած տարվա հունիսից: Մենք հույս ունենք, որ Կիևը լուծում կգտնի, որպեսզի ցանկացած երկրի յուրաքանչյուր պատվիրակություն կարողանա գնալ Ուկրաինա և մասնակցի միջոցառմանը»,- ասել է մրցույթի գործադիր տնօրեն Յոն Օլա Սանդը:

Նշենք, որ մրցույթն այս տարի կանցկացվի մայիսի 9-ին, 11-ին և 13-ին Կիևում: Ընդհանուր առմամբ, «Եվրատեսիլ-2017»-ին կմասնակցի 43 պետություն: Երգի միջազգային մրցույթին Հայաստանը կներկայացնի Առաջին ալիքի «Դեպի եվրատեսիլ» մրցույթի հաղթող Արծվիկը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: