Ձեր վստահելի աղբյուրը

20։13
Շահեն Հարությունյանը հայտարարեց, որ երթն այսօր ավարտվում է, վաղը կրկին կհանդիպեն  Ազատության հրապարակում: Միաժամանակ, Շահեն Հարությունյանը նշեց, որ այսօրվանից Ազատության հրապարակում նստացույց են սկսելու: Նա ասաց, որ պահանջագիր են կազմելու՝ Արդարադատության և Առողջապահության նախարարների հրաժարականը պահանջելու

19։52
Ոստիկանները շղթա են կազմել։ Շահեն Հարությունյանը դիմելով ոստիկաններին՝ հորդորեց չխոչընդոտել ՀՀ քաղաքացիների ազատ խոսքի, ազատ տեղաշարժման իրավունքը, իրենք  ոստիկանության դեմ ոչինչ չունեն, իրենց բողոքը կոնկրետ Արդարադատության նախարարությանն է ուղղված:

Վալերի Օսիպյանն էլ նշեց, որ ոստիկանությունը ցավում է տեղի ունեցածի համար, սակայն դա չի նշանակում, որ երթի մասնակիցները պետք է օրենք խախտեն:

«Մենք հանդուրժողականություն ենք դրսևորում, բայց թույլ չենք տա, որ սա տևական լինի: Բացի այդ, այսօր այդ օրը չի, հիշատակն այդպես չեն հարգում: Մենք՝ ոստիկաններս, այստեղ հանգիստ կանգնած ենք, հանդուրժում ենք ձեր անօրինական դրսևորումները, բայց հարգելի Շահեն, տիկին Ռուզաննա, պետք չէ տանել քաղաքացիներին… մի՛ արեք այդպես»,- դիմելով Շահեն Հարությունյանին և նրա մորը՝  ասաց Վ. Օսիպյանը:

19։37
Վալերի Օսիպյանը առաջարկեց մի քանի հոգանոց խումբ կազմել, որոնց ոստիկանները կուղեկցեն դեպի նախարարության շենք: Սակայն երթի մասնակիցները ասացին, թե իրենք մեկ խումբ են և բոլորն էլ ասելիք ունեն և պատրաստվում են նախարարությանը «հաց տանել»:

Ոստիկանները թույլ չեն տալից նրանց մոտենալ արդարադատության նախարարության շենքի մոտ: Երթի մասնակիցները փորձում են Խորենացի փողոցով մոտենալ նախարարության շենքին:

19։13
Երթի մասնակիցները կանգ առան ՀՀ գլխավոր դատախազության նախարարության շենքի մոտ, որտեղ  Երևանի փոխոստիկանապետ Վալերի Օսիպյանը նրանց հորդորեց ճանապարհը բացել, որպեսզի երթևեկությունը չխաթարվի: Մինչ արդարադատության նախարարության շենքի մոտ հասնելը, ակտիվիստ Շահեն Հարությունյանը ոստիկաններին կոչ արեց երթի մասնակիցներին չհայհոյել, չխփել. «Մեր կռիվը ոստիկանության հետ չէ. Բայց հանկարծ այնպես չանեք, որ ձեր դեմ էլ կռիվ ունենանք: Լավ եք անում, որ կարգ եք պահում, բայց եթե խփել եք, դուք էլ եք պատասխան տալու»:

Վալերի Օսիպյանը հորդորեց զերծ մնալ բախումներից:

18։54
Ոստիկանները հեռացրել են ցուցարարներին, բացել ճանապարհը: Երթի մասնակիցները շարժվում են դեպի ՀՀ արդարադատության նախարարություն:

18։23
Ազատության հրապարակում մեկնարկել է «Հաց բերող» Արթուր Սարգսյանի  հիշատակին նվիրված բողոքի երթ:

Երթի մասնակիցները «Արթուր, Արթուր» վանկարկումներով շարժվեցին դեպի  Մաշտոցի պողոտա և  փակեցին ճանապարհը: Ոստիկանները փորձում են քաղաքացիներին ճանապարհից  հանել՝ երթևեկությունը վերականգնելու համար։

Հիշեցնենք, որ Երևանի 49-ամյա  բնակիչ Արթուր Սարգսյանին «Հաց բերող» անունով կնքեց հասարակությունը՝ ՊՊԾ շենքը գրաված ու քանի օր պաշարման մեջ գտնվող, հանձնվել չհամաձայնող ու առանց սնունդ մնացած «Սասնա Ծռեր» խմբի անդամներին սնունդ հասցնելու համար:

Նա իր մեքենայով, որի մեջ սնունդ էր միայն, ոստիկանների կրակոցների տակ, մտավ ՊՊԾ գունդ, իր արածը հիմնավորելով, որ չէր կարող առանց հաց թողնել մարդկանց:

Ու թեև ողջ հասարակությունը գնահատեց նրա արարքը մարդասիրական և ապաքաղաքական, այնուամենայնիվ  2016 թվականի հուլիսի 31-ին «Սասնա Ծռերի» կողմից զենքը վայր դնելուց և իրավապահներին հանձնվելուց հետո, Արթուր Սարգսյանը կալանավորվեց և նրան մեղադրանք առաջադրվեց ՀՀ քրեական օրենսգրքի 218 հոդվածի 3-րդ մասի 1-ին կետով (պատանդ վերցնելը) և 235 հոդվածի 3-րդ մասով (ապօրինի զենք զինամթերք ձեռք բերելը, իրացնելը, պահելը, փոխադրելը)։ Օգոստոսի 5-ին վերաորակավորվեց Արթուր Սարգսյանի մեղադրանքը և նա մեղադրվեց զինված խմբի անդամներին օժանդակելու մեջ։

Չնայած փաստաբանների պնդմանը, որ Արթուր Սարգսյանը վատ առողջական վիճակում է և նրա արարքը այնպիսին չէ, որ նրան ձերբակալած պահեն, 2016 թվականի դեկտեմբերի 30-ին Արթուր Սարգսյանին  կալանքից ազատելուց հետո կրկին,  2017 թվականի փետրվարի 9-ին, ձերբակալեցին:

Երկրորդ ձերբակալության առաջին օրվանից Արթուր Սարգսյանն անժամկետ հացադուլ հայտարարեց, ինչի հետևանքով նրա առողջական վիճակը, որ առանց այն էլ լավ չէր, կտրուկ վատացավ:

Մի քանի պատգամավորների միջնորդությամբ նա մարտի 6-ին ազատ արձակվեց, տեղափոխվեց «Արմենիա» ԲԿ:

Այսօր մահացավ: