Ձեր վստահելի աղբյուրը

Ստամբուլի նահանգապետարանի կողմից Պոլսի պատրիարքի ընտրություններին միջամտելու վերաբերյալ արված գրության դեմ են հանդես եկել Թուրքիայի խորհրդարանի հայազգի պատգամավորները՝ այն որակելով որպես Արամ Աթեշյանի կողմից իրականացված «հեղաշրջում»:

Գարո Փայլանը «Ագոսի» հետ զրույցում նշել է, որ Արամ Աթեշյանը տարիներով Պատրիարքարանը ղեկավարել է որպես պետական կառավարիչ և պետության մեջ իր ունեցած կապերով այդ պաշտոնը շարունակելու համար դավադրություն է կատարել:

«Մենք այդ միջամտությունը չենք ընդունում, չենք էլ ընդունելու: Արդյունքում տեղապահի ընտրություններ ենյ կայացել, երկու թեկնածուներից մեկն ընտրվել է, մենք բոլորս պետք է շնորհավորենք ընտրված թեկնածուին և սկսենք Պատրիարքի ընտրությունների գործընթացը»,-ասել է Գ. Փայլանը:

Ընդդիմադիր «Ժողովրդա-հանրապետական կուսակցության» հայազգի պատգամավոր Սելինա Դողանը ևս անընդունելի է համարել այդ միջամտությունը՝ նշելով, որ այն որևէ իրավական հիմք չունի:

Ըստ նրա՝ նահանգապետարանի գրության մեջ հղում է կատարվում հայ համայնքից եկող դժգոհություններին, սակայն այդ դժգոհությունները միայն ուղղված են Պատրիարքի փոխանորդ Արամ Աթեշյանին և վերջինիս հետ են կապված:

«Եթե նման անհանգստություններ կան, ապա պետք է ականջալուր լինել համայնքից եկող արձագանքներին, չպետք է միջամտել ընտրական գործընթացին, որն արդեն ավելի բարդ դարձրեց իրավիճակը»,-նշել է Ս. Դողանը: