Ձեր վստահելի աղբյուրը

Համաձայն ՀՀ կենտրոնական ընտրական հանձնաժողովի՝ հունվարի 11-ի  N 5-Ն որոշման՝ տեխնիկական սարքավորումը սպասարկող մասնագետների ընտրության, դիմումերի ներկայացման, ուսուցման և մասնագիտական գիտելիքների ու աշխատանքային ունակությունների ստուգման կարգը սահմանելու մասին, մեկնարկել է ՀՀ արտակարգ իրավիճակների նախարարության աշխատակիցների ուսուցումը:

ԱԻՆ մամուլի ծառայության հաղորդմամբ՝ Շիրակի և Արագածոտնի մարզերում դասընթացների ընթացքին հետևելու նպատակով ՀՀ ԱԻ փոխնախարար Դավիթ Կարապետյանն այցելել է մարզկենտրոններ: Անդրադառնալով ուսուցման նպատակին՝ Դ. Կարապետյանը նշել է, որ ԱԺ ընտրությունների ժամանակ ընտրատեղամասերում լինելու են տեխնիկական սարքավորումները սպասարկող մասնագետներ: ԱԻՆ-ը հանրապետության բոլոր մարզերում և Երևանում այժմ ձևավորում է տեխնիկական սարքավորումները սպասարկող մասնագետների ռեզերվային խմբեր:

«Ընտրության օրը եթե նախապես գրանցված մասնագետը որևէ ընտրատեղամասում չներկայանա կամ առողջական պատճառներով ստիպված բացակայի տեղամասից, ԱԻՆ աշխատակիցները արագ կարձագանքեն ու կապահովեն տեխնիկական սարքավորումների անխափան աշխատանքը»,- ասել է ԱԻ փոխնախարարը:  

Ըստ որոշման հավելվածի ութերորդ կետի՝ Կենտրոնական ընտրական հանձնաժողովը կարող է կազմակերպել և անցկացնել լրացուցիչ ուսուցում ՀՀ ԱԻՆ համակարգի (այդ թվում առանաձնացված ստորաբաժանումների) ծառայողների հետ և սահմանված կարգով շնորհել մասնագետի որակավորում:

Աղբյուրը նշում է, որ այդ որոկավորումը ձեռք բերած ՀՀ ԱԻՆ 12 մասնագետ ԿԸՀ-ի կողմից տրամադրված ձեռնարկներով և նմուշ-օրինակով համակարգի աշխատակիցների խմբերին ուսուցանում են սարքի սպասարկումն ու գործարկումը: