Ձեր վստահելի աղբյուրը

Սիրելի հայրենակիցներ ջան, «Ելք»-ն այս հրաշալի անձրևային եղանակին եկել է ձեզ նոր գարուն, նոր երկինք, նոր հույս և նոր Հյաաստան մաղթելու։ Այսօր Աջափնյակ վարչական շրջանում քարոզչություն իրականացնելիս ընտրողներին այսպես դիմեց «Ելք» դաշինքի պատգամավորության թեկնածու Նիկոլ Փաշինյանը։

«Մենք եկել ենք ձեզ ասելու, որ Հայաստանն ի վերջո պետք է դուրս գա Սերժ Սարգսյանի և Հանրապետական կուսակցության ստեղծած հուսահատության փոսից։ Մենք եկել ենք ձեզ ասելու, որ ապրիլի 2-ին որոշում կայացնելու հնարավորություն ունեք։ Մենք եկել ենք ձեզ ասելու, որ հավատում ենք ձեր քաղաքացիական ուժին ու գիտակցությանը և հավատում ենք՝ քվեախցիկում միայնակ մնալով՝ դուք ընտրություն կատարելու եք՝ ըստ ձեր խղճի և գիտակցության։

Մենք եկել ենք ձեզ ասելու, որ չենք ուզում՝ մեզ հավատաք, այլ հավատաք ինքերդ ձեզ։ Մենք եկել ենք ասելու, որ հույս ենք դնում ձեզնից յուրաքանչյուրի քվեի վրա, եկել ենք ասելու, որ դուք էլ կարող եք հույս դնել մեզ վրա՝ Հայաստանը հուսահատության փոսից հանելու գործում»,- ասաց Նիկոլ Փաշինյանը։

Պատգամավորության թեկնածուն նաև շեշտեց, որ այն, ինչ իրենք առաջարկում ենք, միայն էմոցիա չէ, այլ համապարփակ ծրագիր։

«Ապրիլի 2-ին դուք պետք է ճակատագրական որոշում կայացնեք, քվեարկեք հանուն ձեր երեխաների և հանուն Հայաստանի ապագայի։ Ապրիլի 2-ին գլուխներդ բարձ, դուխներդ տեղը գնացեք ընտրատեղամաս և ընտրեք «Ելք» դաշինքին։ Հուսահատության այս փոսից ելք կա»,- իր խոսքն ավարտեց պատգամավորության թեկնածուն։