Ձեր վստահելի աղբյուրը

«Ինձ թվում է, միգուցե հնարավոր էր ավելի շուտ ազատել Արթուր Սարգսյանին և ուշադիր լինել բժշկական տեսանկյունից: Ցավում ենք և կարծում ենք՝  հնարավորություն կար, որ Արթուրը չմահանար»,- այս մասին այսօր լրագրողների հետ հանդիպման ժամանակ ասաց  ՀՎԿ պատգամավորի թեկնածու Էդգար Առաքելյանը:

«Ծառուկյան» դաշինքի  թեկնածու Մանուկ Սուքիասյանն էլ նշեց, որ «Հաց բերող» Արթուր Սարգսյանի մահվան հետ կապված ՀՀ իրավապահ մարմիններից պահանջում է պատասխանել երկու հարցի. «Ի՞նչ հրատապություն կար երկրորդ անգամ կալանավորել Արթուրին, այդ որ հարցերը չէին տրվել ամառվանից սկսած, այդ ինչին պետք է խանգարեր Արթուր Սարգսյանը, եթե շարունակեր մնալ ազատության մեջ: Պահանջում եմ պարզաբանումներ ՀՀ քննչական կոմիտեից, Գլխավոր դատախազությունից: Եթե այդ հարցերի պատասխանները չեն տալիս, նշանակում է՝ նրանք քաղաքական պատվեր են իրականացրել»:

Մանուկ Սուքիասյանի խոսքերով՝ բառերն ավելորդ են նկարագրելու այն ցավն ու ցասումը, որ բոլորն ապրում են այս օրերին: «Արթուրը խղճի զոհ էր, նրա մահը խարան է մնալու մեր պետության ճակատին, քանի դեռ ամեն անգամ մարդուն ձերբակալելիս որևիցե  դատավոր կամ քննիչ կշարունակի կատարել քաղաքական պատվեր»,- նշեց  «Ծառուկյան» դաշինքի  թեկնածուն:

«Ելք» դաշինքի թեկնածու Գևորգ Գորգիսյանն էլ նշեց, որ իրենց դաշինքի ներկայացուցիչները պայքարում էին «Հաց բերող»-ի կյանքի համար և արել են այն ամենը, ինչ հնարավոր էր անել:
Հարցին, թե ի նշան հարգանքի, պատրաստվում են դադարեցնել քարոզարշավը, «Ելք» դաշինքի ներկայացուցիչն ասաց, որ իրենք քարոզարշավը չեն դադարեցնելու:

«Չենք կարող թույլ տալ մեկ օր անգամ հապաղել ՀՀԿ-ի ստեղծած իրավիճակը հանդուրժելու համար: Մենք ամեն օր պետք է քրտնաջան աշխատենք, որպեսզի ՀՀԿ-ին զրկենք իշխանությունից: Մենք մահը չէ, որ դարձնելու ենք պոպուլիզմի թեմա: Մենք պայքարելու ենք, որ այլևս չունենանք նմանատիպ դեպքեր: Ուստի պետք է շարունակենք քարոզարշավը և պետք է հաղթենք Հանրապետական կուսակցությանը: Քանի  դեռ օրենքը չի գործում մեր երկրում, քանի դեռ օրենքը բոլորի համար հավասար չէ, մեզանից ոչ ոք ապահովագրված չէ նման ճակատագրից: Եւ հենց դրա համար մենք դուրս ենք եկել պայքարի»,- նշեց Գևորգ Գորգիսյանը: