Ձեր վստահելի աղբյուրը

«Չեմ ցանկանում Ջրառատում տեղի ունեցած միջադեպին գնահատականներ տալ, կարծում եմ, որ իրավապահներն այդ գործը մինչև վերջ կտանեն և  մեղավորները  կկրեն իրենց արժանի պատիժը»,- այս մասին այսօր լրագրողների հետ հանդիպման ժամանակ ասաց ԱԺ ՀՀԿ խմբակցության ղեկավար Վահամ Բաղդասարյանն՝ անդրադառնալով Ջրառատում տեղի ունեցած միջադեպին։

Նա նաև նշեց, որ եթե կան պատվիրատուներ, ապա առաջին հերթին պետք է նրանք պատժվեն:

Վահրամ Բաղդասարյանի խոսքերով՝  ինչպես ամբողջ աշխարհում, այնպես էլ Հայաստանում, չկա օր, որ ոստիկանությունում հայտարարություններ չգրանցվեն, իսկ ընտրությունների ժամանակ, բնականաբար, դրանք բոլորը վերագրում են ընտրական պրոցեսներին:

«Իհարկե ես չեմ ցանկանում պաշտպանի դերում հանդես գալ՝ ասելով, որ միջադեպերն ընտրությունների հետ կապ չունեն, կան միջադեպեր և չի բացառվում, որ կարող  են նորից լինել։ Համենայնդեպս, մենք պետք է զգոն լինենք  ու կարողանանք կանխել ու դատապարտել նման միջադեպերը», - նշեց ՀՀԿ խմբակցության ղեկավարը:

Նա միաժամանակ ասաց, որ այն «արջի ծառայությունները», որոնք  մատուցվում են՝ ստվեր են գցելու այս ընտրությունների որակի վրա։ Ուստի, ըստ  Վահրամ Բաղդասարյանի, իրավապահ մարմինները պետք է շատ զգոն լինեն, անմիջապես բացահայտեն ու խստագույնս պատժեն, քանի որ եթե չպատժեն, մարդիկ կարող են առիթից օգտվել։

Դիտարկմանը, թե Ջրառատի դեպքերի հետ կապված հանրապետության համայնքներում ստեղծվել է վախի մթնոլորտ և շատ մարդիկ չեն գնում ընդդիմության հավաքներին հենց նման դեպքերի պատճառով, Վահրամ Բաղդասարյանը նշեց, թե ընդդիմադիրները վախի մթնոլորտին են վերագրում իրենց հավաքներին քիչ մարդ լինելու հանգամանքը։

«Շատ քաղաքական ուժերի նպատակը 5 կամ 7 տոկոսը հաղթահարելն է, դա իրենց ռեսուրսն է, ուստի, եթե հավաքներին քիչ մարդիկ են լինում, դա պետք չէ վերագրել վախի մթնոլորտին: Օրինակ, Լոռվա մարզում, բացարձակապես նման  մթնոլորտ չկա: Ինչի՞ց պետք է վախենան, ի՞նչ ունի կորցնելու ժողովուրդը, դրանք պարզապես շահարկումներ են», - ասաց ՀՀԿ խմբակցության ղեկավարը:

Անդրադառնալով Ժիրայր Սեֆիլյանի՝ «ՕՐՕ» դաշինքին միանալու հայտարարությանը, Վահրամ Բաղդասարյանը ասաց,  թե Սեֆիլյանն ինքը պետք է մեկնաբանի՝ ինչ դրդապատճառներով է նման որոշում կայացրել:

Հարցին, թե արդյոք Սեֆիլյանի «ՕՐՕ»-ին միանալը իշխանություններին չի՞ անհանգստացնում, Վահրամ Բաղդասարյանն արձագանքեց. «Մենք բոլոր քաղաքական ուժերին լուրջ ենք վերաբերվում, որևէ ուժի չենք թերագնահատում: Յուրաքանչյուր քաղաքական ուժ, որը մասնակցում է ընտրապայքարին, պետք է անհանգիստ լինի, բայց ոչ վախեցած»: