Ձեր վստահելի աղբյուրը

«Շատ հանգիստ կարելի էր սրանից խուսափել, եթե Հայաստանում գործող գիշատիչ համակարգը, որը հետևողականորեն խոշտանգեց Արթուր Սարգսյանին, այսօր Հայաստանում չգործեր»,- «Կոնրադ Ադենաուեր» հիմնադրամի կազմակերպած քննարկմանն ասաց ՀԱԿ ներկայացուցիչ Արման Մուսինյանը՝ խոսելով Արթուր Սարգսյանի մահվան հանգամանքների մասին:

Նրա խոսքով, փաստ էր, որ Արթուր Սարգսյանն ուներ առողջական խնդիրներ, որոնք անհամատեղելի էին ազատազրկման վայրում գտնվելու հետ:

Քննարկմանը ներկա ՀՀԿ ներկայացուցիչ, արդարադատության նախկին նախարար Հրայր Թովմասյանը հորդորեց զերծ մնալ գնահատականներից, մինչև չավարտվի քննությունը, քանի որ իր համար էլ, որպես քաղաքացի, շատ ու շատ հանգամանքները պարզ չեն, օրինակ՝ պարզ չէ կալանքի ու մահվան պատճառահետևանքային կապը:

«Ես հասկանում եմ նաև, որ բավականին լավ առիթ  է իշխանություններին քննադատելու համար»,- ասաց Հ.Թովմասյանը:

Նա նշեց, որ ոլորտում կան մի շարք խնդիրներ՝ կալանքը որպես խափանման միջոց ընտրելու հետ կապված վիճակագրությունն այնքան էլ շահեկան չէ Հայաստանի համար,  քրեակատարողական համակարգում բուժսպասրակման խնդիրը:

«Միանում եմ բոլոր պնդումներին, որ այս գործի բոլոր հանգամքները, պահանջները, որոնք ուղղված են գործի բոլոր փաստական հանգամանքները  համակողմանի, օբյեկտիվ, հրապարային քննության առարկա դարձնելուն, պետք է կատարվեն: Եթե այդ ամբողջ օղակում կան մեղավորներ, պետք է պատժվեն: Իսկ քաղաքական ուժերը պետք է փորձեն գտնել դրան ծնող օրենսդրական  պատճառները, որպես քաղաքականություն մշակող մարմին՝ մշակեն այն իրավական ակտերը, որոնք կբացառեն նման իրավիճակները»,- ասաց Հ. Թովմասյանը:

Նա նշեց, որ ցանկացած երկրում, անգամ զարգացած, նման բաներ լինում են. «Բայց, հաշվի առնելով, որ անձը մահացել է ազատության մեջ լինելով, ուղղակի հետևություններ անելու համար կհորդորեի սպասել մինչև քննություն անցկացվի, լինի եզրակացություն ու նոր գնահատականներ հնչեն»:

ՀՅԴ ներկայացուցիչ Արթուր Խաչատրյանը նշեց, որ տեղի է ունեցել ողբերգություն, պետք է գործը մանրակրկիտ ուսումնասիրվի, մեղավորները կրեն օրենքով նախատեսված ամենախիստ պատիժը:

«Տեղի է ունեցել ողբերգություն: Շատ սարսափելի է, որ ողբերգությունը կարող է որոշ քաղաքական ուժերի համար դառնալ շահարկման առարկա»,- ասաց նա:

«Հայկական Վերածնունդ» կուսակցությունից Վիլեն Խաչատրյանի խոսքով, յուրանքանչյուր օղակ իր մասնաբաժինն ունի այս գործում, ամեն մեկը կարող էր կանխել այս դեպքի հասունացումը: Նա նշեց, որ նման դեպքերի շարքակումը քաղաքական տեսանկյունից չի բխում բարոյական սկզբունքներից: