Ձեր վստահելի աղբյուրը

«Մենք առաջին անգամ ենք կանգնած այն փուլի շեմին, երբ մեր պլանավորած սեփական եկամուտների մասին տարեվերջին հարցնելու են, ոչ թե ինչքան ենք թերի կատարել, այլ ասելու են, որ գերակատարել ենք»,- Գավառում քաղաքացիների հետ հանդիպմանը հայտարարեց վարչապետ Կարեն Կարապետյանը:

Կառավարության ղեկավարի խոսքով, այս տարվա առաջին երկու ամիսներին նախորդ տարվա նույն ժամանակահատվածի համեմատ՝ եկամուտների աճը կազմել է 19 տոկոս՝ դրամային արտահայտությամբ 16 մլրդ դրամ:

«Մեկի տարի անց այս թվերի մասին Ազգային վիճակագրական ծառայությունը կհայտարարի: Այս պահին մեր ձեռքի տակ նախարարություններից հավաքված տվյալներն են՝ հնարավոր է մի փոքր շեղում լինի»,-ասաց նա:

Կարեն Կարապետյանի ներկայացրած տվյալների համաձայն, արտահանման ծավալներն ավելացել են 35 տոկոսով, արդյունաբերության ոլորտում 16 տոկոս աճ է գրանցվել:

«Արդյունաբերության ոլորտում ոսկերչության ճյուղում գրանցվել է 340 տոկոս, 150 տոկոս՝ խմիչքների աճ,  107 տոկոս՝ մետալուրգիայի աճ: Ընդ որում՝ ամենաքիչ տոկոսն ապահովել է հանքարդյունաբերությունը, որը մեր տնտեսության մեջ մեծ դեր ունի»,-ասաց կառավարության ղեկավարը:

Շարունակելով թվարկել այս ընթացքում իշխանությունների կողմից կատարած քայլերը, նա հիշեցրեց՝ նվազեցրել են գազի գինը, կարմիր գծերի, արագաչափերի ու տեսախցիկների արդյունքում գոյացած միջոցները տեղափոխել են համայնքային ենթակայության ներքո, տուրիզմի զարգացման համար բազմթաիվ երկրների քաղաքացիների մուտքը Հայաստան հեշտացրել են, Ռուսաստանի քաղաքացիները Հայաստան կարող են գալ ներքին անձնագրերով:

«Այս տարի մենք ակնկալում ենք, որ կունենանք ռուսաստանցի զբոսաշրջիկների թվի կրկնակի աճ»,-ասաց նա:

Վարչապետն ասաց, որ պարարտանյութի համար բյուջեից նախկինում տրամադրում էին 2.3 մլրդ դրամ, այս տարի տնտեսել են 1.2 մլրդ, դրա փոխարեն նրանք կարող են ցածր տոկոսով գյուղտեխնիկա ձեռք բերել:

«Գյուղատնտեսության մեջ մեր բարեփոխումները հիմնվում են ժամանակակից տեխնոլոգիաների վրա»,-ասաց նա:

Գավառցիների հետ հանդիպմանը ՀՀԿ ընտրական ցուցակի 4-րդ հորիզոնականում գտնվող Արա Բաբլայոնն իր խոսքում ասաց, թե  ամաչում է, երբ այսօր խոսում են կոռուպցիայի առկայության մասին:

«Բայց ցավոք, դա դեռ կա: Ուրախ եմ, որ այսօր մեր կառավարությունը՝ վարչապետի գլխավորությամբ հետևողականորեն անում է քայլեր, որոնք պետք է արմատախիլ անեն կոռուպցիան»,-ասաց նա:

Բաբլոյանի խոսքով, եթե Հայաստանն իր ունեցած փոքր ռեսուրսները ճիշտ չծախսի, ապա ընդհանրապես երկիրը հաջողության չի հասնի:

Բժշկական կենտրոնի ղեկավար Բաբլոյանն ասաց, որ անցած տարիներին առողջապահական համակարգում բարեփոխումներ են եղել, հիշեցրեց ՀՀ նախագահի՝ ՀՀԿ համագումարում արած հայտարարությունը, որ հաղթելու դեպքում Կարեն Կարապետյանն է լինելու վարչապետ:

«Մենք պետք է այդ քվեն ունենանք, որպեսզի հնարավորություն տանք, որպեսզի մեր վարչապետն իր թիմի հետ շարունակի այն, ինչ սկսել է, քանի որ դրա հիմքում դրել է այն, ինչ մենք ձեզ հետ երազում ենք»,-ասաց Բաբլոյանը: