Ձեր վստահելի աղբյուրը

«Հարգելի վարչապետ,  որքանո՞վ եք համոզված և որքանո՞վ եք երաշխավորում, որ ՀՀԿ-ի ընտրվելուց հետո հինգ տարիների ընթացքում կլինեք մեր հանրապետության վարչապետը»,- այսօր Դիլիջանում ՀՀԿ-ի քարոզարշավի ժամանակ «Հանրապետական» կուսակցության նախագահի առաջին տեղակալ, վարչապետ Կարեն Կարապետյանից հետաքրքրվեց քաղաքացիներից մեկը:

Վարչապետը ծիծաղելով  արձագանքեց. «Էդ ոնց որ մարզպետի պատրաստած հարցն ա»:
Դահլիճում հնչած բուռն ծիծաղից հետո Կարեն Կարապետյանն ավելացրեց. «Ամբողջ խնդիրը նրանում է, որ ես չպետք է Ձեզ երաշխավորեմ, այլ դուք պետք է այդ շանսն ինձ տաք: Հիմա, եթե դուք էդ շանսը տաք, դրանից հետո ինձանից կպահանջեք»:

Դիլրջանցի մի կին էլ խոսեց իրենց թաղամասի գազիֆիկացումից, փողոցների ոչ բարվոք վիճակից և դիմելով վարչապետին ասաց. «Ես ինքս ձեր կուսակցականն եմ, ամբողջ իմ թաղամասը նույնպես: Ձեզ հետ ենք, Ձեզ շատ սիրում ենք ու հավատում: Թաղամասը գազիֆիկացված չէ, չունենք ճանապարհային լուսավորում, ճանապարհի վիճակի մասին էլ չեմ խոսում: Վերջերս որոշակի գործողություններ են կատարել ու մի քիչ բարվոք վիճակում է:  Բազմիցս դիմել ենք քաղաքապետին, բազմաթիվ պաշտոնյաների, նրանք ասել են, որ մենք պլանից դուրս ենք: Խնդրում եմ բացատրել, թե պլանից դուրս ինչ է նշանակում: Եթե ընտրություններից առաջ մենք պլանի ներսում ենք, հենց ընտրվում են խոսք են տալիս, բայց հետո պլանից դուրս ենք գալիս»:  

Կարեն Կարապետյանը նախ հետաքրքրվեց, թե ծանո՞թ են Դիլիջանի զարգացման ռազմավարական ծրագրի հետ, որից հետո նշեց, որ մարդիկ պետք է իմանան իրենց իրավունքները, որ կարողանան իրենց պաշտպանեն:

Նա դիլիջանցիներին խորհուրդ տվեց ծանոթանալ վերանշյալ ծրագրի հետ և եթե նրանց բարձրացրած հարցերի լուծումը չկա, ապա պետք է դիմել համայնքի ղեկավարին:

«Վարչապետի գործառույթներն ու պարտականություններն այնքան շատ են, որ բոլոր հարցերն համար առաջին են: Չես կարող ասել՝ կրթությունը առաջին տեղում է, աղբահանությունը, ճանապարհաշինությունը երկրորդ և այլն: Բոլորը համար առաջին են, բայց մենք մեզ համար թիվ մեկ խնդիրը համարում ենք այն, որ հասարակության հետ հետադարձ կապը հաստատենք այնպես, որ մեր տված ազդակները ժողովուրդը հասկանա, եթե զգում է, հավատում է, իր սրտով է, դառնա դրա կրողը և մեզ հետ զուգահեռ իրավիճակը փոխի»,- ասաց Կարեն Կարապետյանը:

Նրա խոսքերով՝ ներկաներից որևէ մեկն, օրինակ, չի ասի, որ կողմ է կոռուպցիային, բայց դահլիճում նստածներից շատերը նախընտրում են ճանապարհային ոստիկանությանը տալ 1000 դրամ, քան վճարել 3000 դրամ տուգանքը: Ըստ վարչապետի՝ այդ երևույթների դեմ պետք է համատեղ ուժերով պայքարել:

«Երբ Դուք ակտիվ դիրքորոշում ունենաք և մասնակցեք համայնքի զարգացման ծրագրի ձևակերպմանը,  այդ դեպքում Դուք պլանից դուրս չեք մնա»,- ընդգծեց Կարեն Կարապետյանը: