Ձեր վստահելի աղբյուրը

«Եթե հաղթեց ընտրակեղծիքը, ընտրակաշառքը, երկրում ոչ մի դրական փոփոխություն չի կարող լինել: Դա նպաստելու է արտագաղթի աճին, էլ ավելի է խորացնելու հուսալքությունը, վտանգելու է մեր երկրի, երեխաների ապագան»,- նախընտրական քարոզարշավի շրջանակներում Գեղարքունիքի մարզում ընտրողների հետ հանդիպմանն ասաց Կոնգրես-ՀԺԿ դաշինքի համապետական ցուցակի երկրորդ համարը զբաղեցնող, ՀԺԿ առաջնորդ, ԱԺ պատգամավոր Ստեփան Դեմիրճյանը:

Նրա խոսքով, դաշինքը հետամուտ է լինելու երկրում կարգուկանոնի, օրինականության հաստատմանը, թալանված միջոցները պետք է հետ վերադարձվեն բյուջե:  Ս. Դեմիրճյանը նշեց, որ խորհդարանում պետք է ներկայացված լինեն գրագետ, ազնիվ, պետական մտածելակերպ, երկրի, ժողովրդի նկատմամբ պատասխանատվության զգացում ունեցող մարդիկ:

«Ապրիլի 2-ը հնարավորություն է տալիս փոխել իրավիճակը, նախադրյալներ ստեղծել մեր երկրի զարգացման համար»,- ասաց ՀԺԿ առաջնորդը:

Խոսելով իրենց դաշինքի խաղաղության ծրագրի մասին, Ս. Դեմիրճյանը նշեց, որ երբ խոսում են խաղաղության մասին, դա չի նշանակում խաղաղություն ամեն գնով:

«Անհրաժեշտության դեպքում, իհարկե,  մենք պետք է նաև ի վիճակի լինենք պարտադրել խաղաղություն, Ադրբեջանի ղեկավարությունը պետք է գիտակցի, որ ռազմական ճանապարհով հարցի լուծում չկա»,- ասաց նա:

Նրա խոսքով, խաղաղության հաստատումը կնպաստի երկրի զարգացմանը, նոր հեռանկարներ կբացի երկրի առաջ:

«Բայց չի նշանակում, որ եթե չկա խաղաղություն, այս վիճակը կարող ենք արդարացել ղարաբաղյան հակամարտությամբ կամ այլ արտաքին գործոններով: Դրանք, իհարկե, ազդում են, բայց արդարացնել այս վիճակը չի կարելի միայն արտաքին գործոններով: Այս վիճակին հասցրել են կոնկրետ քաղաքական ուժեր, կոնկրետ մարդիկ»,- ասաց Ս.Դեմիրճյանը: