Ձեր վստահելի աղբյուրը

ՌԴ-ում ՀՀ դեսպան Վարդան Տողանյանը երեկ  հանդիպել է ռուսաստանյան «Հայկական բիզնես ակումբի» անդամների հետ։ Դեսպանությունում կայացած հանդիպմանը մասնակցել են մոտ երկու տասնյակից ավելի ռուսաստանյան ձեռնարկությունների սեփականատերեր, ֆինանսատնտեսական ընկերությունների ղեկավարներ և անհատ ներդրողներ։

Ակումբից հայտնում են, որ ՌԴ-ում ՀՀ նորանշանակ դեսպան Վարդան Տողանյանը կիսվել է ներկաների հետ հայ-ռուսական երկկողմ առևտրատնտեսական կապերի ամրապնդման շուրջ իր մոտեցումներով, կարևորել է երկկողմ առևտրատնտեսական շփումներում առկա բացը լրացնելու անհրաժեշտությունն ու կոչ արել գործրարներին փնտրել երկկողմ առևտրաշրջանառության խորացմանն ուղղված նոր ձևաչափեր և տարբերակներ։

Դեսպանը խոսել է նաև Հայաստանի տնտեսության տարբեր բնագավառներում՝ ՏՏ ոլորտից մինչև գյուղատնտեսություն, առկա հնարավորությունների և կառավարության կողմից մշակված ներդրումային ծրագրերի մասին։  

Ռուսաստանաբնակ հայազգի գործարարներն իրենց հերթին ներկայացրել են Հայաստանի հետ առևտրատնտեսական կապերի զարգացման ուղղությամբ իրենց տեսլականն ու հետաքրքրվել ՀՀ նախագահի՝ ՌԴ կատարած պաշտոնական այցի արդյունքներով և առաջիկա խորհրդարանական ընտրություններով։

Հանդիպմանը ներկա որոշ գործարարներ, մասնավորապես, ընդգծել են, որ Հայաստանի տնտեսության մեջ ռուսաստանյան կապիտալի հետագա ներգրավմանը մեծապես կնպաստեն առաջիկա ընտրությունների սահուն անցկացումն ու խորհրդարանական կառավարման համակարգին խաղաղ անցումը՝ դրական ազդեցություն թողնելով մեր երկրի միջազգային վարկանիշի վրա։