Ձեր վստահելի աղբյուրը

«Ում հավատում եք, ում հետ հույսեր եք կապում նրան էլ ձեր ձայնը տվեք ու պահանջեք»: Աբովյանցիների հետ հանդիպմանը կոչ արեց «Ծառուկյան» դաշինքի համապետական ընտրական ցուցակը գլխավորող ԲՀԿ նախագահ Գագիկ Ծառուկյանը:

Նա նշեց, որ բոլոր քաղաքական ուժերի ներկայացրած նախընտրական ծրագրերն էլ շատ գեղեցիկ են, շատ լավն են, «որ պատկերացնում ես ընտրություններից հետո Շվեյցարիա է լինելու»:

Դրա համար նա հորդորեց առաջնորդվել ոչ թե գրածներով, այլ մարդկանց արարքներով, նրանց արած գործերով, կամեցողությամբ:

Նա այստեղ էլ ասաց, թե ինչ պետք է անել՝ գյուղատնտեսական վարկերի տոկոսները նվազեցնել, թոշակները բարձրացնել, աշխատատեղեր բացել:

«Ես ասում եմ, եթե մենք այսօր մենակ 6 մլրդ պետական պարտք ունենք, որով միայն թոշակ ու աշխատավարձ են տվել, ես ասում եմ, որ դրանից 2 մլրդը ներդրում անեինք, դուք պատկերացնում եք, ինչ գործարաններ կարելի էր ստեղծել: Սա է խնդրի լուծումը, ուրիշ ճար չկա, առողջացման ծրագիր է պետք»,-ասաց Ծառուկյանը:

Նա այսօր քարոզարշավին հրավիրել էր եվրոպացի փորձագետների, ասաց, նրանք էլ դրական են արտահայտվել դաշինքի նախընտրական ծրագրի մասին:

Աբովյանում էլ Ծառուկյանը մշտական հարցն ուղղեց, վարկի տոկոսի չափի մասին, պատասխանեցին՝ 24 տոկոս: Այստեղ էլ գուժեց՝ որ մարդիկ անդուդն են գնում:

«Մենք ունենք 650 հազար ընտանիք և 1 մլն 450 հազար վարկառու: Այսինքն, ամեն ընտանիքից 2-3 մարդ ճարահատված ընկել է այդ թալաքի մեջ: Մենք պետք է օրենք ստեղծենք, հնարավորություն տանք իրավիճակը փոխել»,-ասաց նա՝ ինչպես միշտ հիշեցնելով, որ ինքը Հարվարդ չի ավարտել, բայց կյանքի մեծ փորձ ունի:

Հրազդանցիների հետ նա հանդիպումն անցավ տեղացող ձյան տակ:

«Տեսնելով ոնց եք ես ձյանը եկել ինձ հետ հանդիպման, այսքան մարդ տեսնելով եթե արժանացել եմ այս հարգանքին ու հավատին, սրբության պես պետք է պահեմ, պահպանեմ, իմ ժողովրդի հավատը, հարգանքն ու պատիվը Ծառուկյանի հանդեպ: Ես ասել եմ, որ ես պարտք ունեմ ժողովրդին տալու»,-ասաց նա: