Ձեր վստահելի աղբյուրը

Ցածր տոկոսադրույքով վարկեր, ապահովագրական համակարգի ներդրում, գյուղտեխնիկայի նորացում, մշակվող հողատարածքների մակերեսի ավելացում: Գյուղատնտեսության ոլորտում խորհրդարանական ընտրությունների առաջարկությունները գրեթե կրկնվում են:

Հայաստանի Կոմունիստական կուսակցությունը «ցավով արձանգրում է», որ ազատական բարեփոխումներն այս ոլորտում բացասական հետևանքներ են ունեցել:

«Դրանց արդյունքում վերացվեցին կոլեկտիվ և պետական տնտեսությունները և ստեղծվեցին մոտ 330 հազար գյուղացիական տնտեսություններ: Հայաստանի հողային ֆոնդը կազմում է մոտ 440 հազար հա, որի գրեթե 30%-ը չի մշակվում: Հողի սեփականաշնորհման արդյունքում հողային ֆոնդի մոտ 15%-ը կորսվել է հողակտորների միջև ճանապարհների անցկացման արդյունքում»,-ծրագրում նշել են նրանք:

Նրանք մտադիր են ոլորտը զարգացնելու համար գյուղացուն ցուցաբերել պետական աջակցությամբ ցածր՝ 2-3 տոկոսով, երկարաժամկետ վարկեր տրամդրելով,  գյուղացու աշխատանքը կենսաթոշակի անցնելու ժամանակ հաշվել որպես աշխատանքային ստաժ,  սուբսիդավորել գյուղատնտեսական մթերքների արտադրությունը, ստեղծել մեքենատրակտորային կայաններ պետություն-մասնավոր գործընկերության համատեքստում:
Կոմունիստները մտադիր են ստեղծել տոհմաբուծական և սերմնաբուծական տնտեսություններ գյուղացիական տնտեսություններին և միավորումներին աջակցելու համար:

ՀՀԿ-ում, բացի  չօգտագործվող գյուղատնտեսական նշանակության հողերի առկայությունից , այլ «խնդրներ էլ են ախտորոշել»: Օրինակ,  ժամանակակից ֆերմերների խավի ձևավորման խիստ ցածր տեմպեր, ձևավորմանն աջակցող կառույցների և գործընթացների անբավարարություն, ինտենսիվ գյուղատնտեսության և առաջադեմ տեխնոլոգիաների ոչ բավարար տարածվածություն, գյուղատնտեսության մեքենայացման ցածր մակարդակ, տնտեսավարողների ժամկետանց վարկեր, գյուղատնտեսական արտադրանքի իրացման ոչ արդյունավետ համակարգ:

Դրա արդյունքում, ըստ ՀՀԿ-ի, երկրում ցածր արտադրողական բազմաթիվ տնտեսություններ ի վիճակի չեն ապահովել բավարար կենսամակարդակ, առկա է գյուղատնտեսության ներուժի ցածր իրացման մակարդակ, պարենի ներմուծման օպտիմալից բարձր մակարդակ:

Ըստ ծրագրի, ՀՀԿ-ն նպատակ ունի  ապահովել աստիճանական անցում արտահանմանն ուղղված բարձր արտադրողական և վերամշակված սննդի շղթային՝ ինտեգրված գյուղատնտեսության և զբաղվածության հնարավորինս բարձր մակարդակի պայմաններում: Նպատակին հասնելու համար մտադիր են առաջիկա երկու տարիների ընթացքում բարձրացնել գյուղատնտեսական հողատարածքների նպատակային օգտագործման մակարդակը, ստեղծել համապատասխան պայմաններ 2018-2020 թվականների ընթացքում տարեկան մինչև 100 հեկտար նոր ինտենսիվ պտղատու այգիների հիմնման համար, ավելացնել գյուղատնտեսությանը տրամադրվող վարկերի մատչելիությունը, մսի իրացման գործընթացում ստեղծել պարտադիր սպանդանոցային մորթի պահանջներ՝ 2017-2018 թվականներին մինչև 65 տոկոս սպանդանոցային մորթի անցման նպատակով, ապահովել գյուղատնտեսական տեխնիկայի նորացման, սպասարկման և մատակարարման մատչելի մեխանիզմների ներդրումը: ՀՀԿ-ն գյուղաբնակն ընտրողներին խոստանում է  շարունակական դարձնել գյուղատնտեսության մեջ ապահովագրական համակարգի ներդրման փորձնական ծրագրերի իրականացումը:

«Գերկարևորություն ենք տալու սննդամթերքի անվտանգության հարցերին։ Վերացնելու ենք վերահսկողական մեխանիզմների թերությունները և բարձրացնելու ենք արդյունավետությունը, որպեսզի խանութներում վաճառվող սննդի որակը անհանգստության պատճառ չհանդիսանա: Միաժամանակ ձգտելու ենք մեր երկրի պարենային անվտանգության մակարդակի բարձրացմանը՝ որպես ռազմավարական նշանակության նպատակ»,-ասված է իշխող ուժի ծրագրում:

«Ազատ դեմոկրատներ»-ը «ոլորտին լուրջ են վերաբերվում»՝ այն որակելով  ընտանիքին, քաղաքին ու բանակին կերակրող:

Ընտրություններում հաջողության հասնելու դեպքում նրանք մտադիր են օրենսդրորեն սահմանել գյուղացիական, ֆերմերային տնտեսությունները, գյուղատնտեսական ձեռնարկությունները՝ տարբերակելով միկրոբիզնեսը, ՓՄՁ-երը և գյուղատնտեսական ձեռնարկությունները՝ նրանց հնարավորություն տալով օգտվել առաջարկվող դիվերսիֆիկացված ու խթանիչ քաղաքականություններից:

Մտադիր են սուբսիդավորել գյուղատնտեսական մթերքների արտադրությունը, մասնավորապես ամեն տարի ՀՀ բյուջեում առանձին հավելվածով նշելով այն մթերքների և գյուղական բնակավայրերի (հատկապես՝ լեռնային ու ծայրամասային գյուղերում) անունները, որոնց նկատմամբ տվյալ բյուջետային տարում սուբսիդիաներ են նախատեսվում, մթերման համապատասախան փաստի դիմաց գյուղացուն սուբսիադիա տրամադրել յուրաքանչյուր միավոր արտադրված մթերթի հաշվով, լեռնային գյուղական բնակավայարերում սուբսիդավորման քաղաքականությունը զուգակցել երաշխավոված մթերման գների քաղաքակության հետ:

«Ազատ դեմոկրատներ»-ը գտնում են, պետք է խրախուսել փոքր գյուղացիական տնտեսությունների զարգացումը, պայքարել խոշոր հողատիրության դեմ, վերականգնել վարելահողերի սեփականության նկատմամբ տվյալ համայնքի գյուղացիների առաջնային իրավունքները:

Պետության մասնակցությամբ ստեղծել 5-10 մեծածախ շուկաներ, և աջակցել գյուղացիական տնտեսությունների կողմից մանրածախ շուկաների հիմնմանը: Խրախուսել փոքր ու միջին, էլիտար ու էկոլոգիապես մաքուր մթերքներ արտադրող գյուղացիական տնտեսությունների գործունեությունը:

Դուրս գրել կամ մասնակիորեն մարել գյուղացիական տնտեսությունների վարկային պարտքերը»,-նշված է նրանց ծրագրում:
Ոլորտում նրանց անելիքներն այսքանով չեն սահմանփակվում:

«Հայկական վերածնունդ» կուսակցությունն առաջարկում է  իրականացնել գյուղատնտեսության ապահովագրման« քաղաքակիրթ համակարգի ներդրում», որի շնորհիվ գյուղացին կստանա երաշխավորված ֆինանսական օգնություն աղետների դեպքում, ինչպես նաև գյուղատնտեսական կոոպերատիվների զարգացում:

«Գյուղմթերող ձեռնարկություններին պետական աջակցություն և գյուղատնտեսական ոլորտում ընտանեկան բիզնեսի զարգացման համակարգի ներդրում: Սեփականության իրավունքով հողատարածք ունեցող կանանց աշխատանքը, որպես աշխատանքային ստաժի համարում՝ կենսաթոշակի ամենամյա ինդեքսավորմամբ ու բարձրացմամբ»,-ասված է ՀՎԿ ծրագրում:

Ոլորտի խնդիրների ու զարգացմանն ուղղված քայլերի վերաբերյալ մյուս կուսակցությունների ծրագրերը՝ հաջորդիվ: