Ձեր վստահելի աղբյուրը

«Մենք գնում ենք փոփոխութունների, ոչ թե մի քանի  հոգի մանդատ ունենալու: Մենք գնում ենք երկրում արմատական իրավիճակ փոխելու ուղղությամբ»,-նախընտրական քարոզարշավի շրջանակում Աշտարակում քաղաքացիների հետ հանդիպմանն ասաց «Օհանյան-Րաֆֆի-Օսկանյան» դաշինքի պատգամավորության թեկնածու (համապետական ցուցակում՝ 2-րդ համար), «Ժառանգություն» կուսակցության փոխնախագահ Արմեն Մարտիրոսյանը:

Նա նշեց, որ Հայաստանին պետք է օր ու գիշեր աշխատող վարչապետ. «Հայաստանին պետք է վարչապետ, որ ոչ թե լավ թմբուկ նվագի, շատ լայն ժպտա, հատկապես կանայք, կարծեք թե, սիրում են այդ ժպիտը, այլ պետք է վարչապետ, որ օր ու գիշեր աշխատի, ոչ թե անեկդոտներ պատմի»:

Ա. Մարտիրոսյանը նաև կարծիք հայտնեց, որ ընտրություններից հետո վարչապետ Կարեն Կարապետյանը կհեռանա. «Ասելու է՝ ես գնացի բարձր աշխատավարձի, ինչպես քաղաքապետ եղած ժամանակ: Սա է իրականությունը»:

Դաշինքի պատգամավորության թեկնածու (համապետական ցուցակում՝ 3-րդ համար), ՀՀ  նախկին արտաքին գործերի նախարար Վարդան Օսկանյանն ասաց, որ իշխանափոխությունը շատ ռեալ է:

«Չգիտեմ՝ անցած 25 տարում երբևէ այսպիսի իրավիճակ ստեղծվել է, թե ոչ: Ինչքան հիշում եմ՝ չի ստեղծվել: Իշխող ուժը բավարար ձայներ չունի ոչ կոալիցիոն կառավարություն կազմելու համար, առավել ևս ինքնուրույն շարունակելու իշխել: Գիտենք, որ ամեն ինչ անելու են բարձր թիվ հավաքելու համար, սակայն նույնիսկ այդ պարագայում  ուղղակի անհնար է, որ կարողանան 20-25, լավագույն դեպքում 30 տոկոսից ավելի հավաքել: Մնում է 70 տոկոս, որը հնարավորություն կտա 2-3 քաղաքական ուժերի ընտրություններից հետո համախմբվեն, կառավարություն կազմեն, իսկ իշխող ուժին ուղարկեն ընդդիմություն: Հավատացեք, որ սա շատ ռեալ է: Նոր Սահմանադրությունը մեզ տալիս է այդ հնարավորությունը»,- հայտարարեց Վ. Օսկանյանը՝ համոզմունք հայտնելով, որ  իրենց դաշինքն այդ նոր  կառավարության մեջ ծանրակշիռ տեղ է ունենալու, կարողանալու է իրականացնելու ծրագիրը, որը կոչվում է «365 օր»:

Ներկայացնելով իրենց ծրագրի հիմնական դրույթները՝ նա ասաց. «Երկու բան, որ դաշինքի ղեկավարներին, նրանց համախոհներին բացարձակապես չի հետաքրքրում: Սա մենք մեր գործունեությամբ ենք ապացուցել. ավարտել ենք մեր պաշտոնավարման շրջանը, մեզ նոր պաշտոն են առաջարկել, ասել ենք՝ ոչ: Մեր 10 տարվա պաշտոնավարության շրջանում մի կոպեկ չենք կուտակել, ինքնահարստացման չենք գնացել: Այդ երկու արժանիքները, որոնք էական են, իսկապես, արդար պետություն ունենալու համար, ունենք մենք, կարողանելու ենք իսկապես տնտեսությունը շատ արագ ոտքի կանգնեցնել»:

ՕՐՕ դաշինքը գլխավորող Սեյրան Օհանյանը նշեց, որ գալով իշխանության՝ նոր  կառավարման մշակույթ են բերելու, որի հիմքում դրված է լինելու ոչ միայն հեռանկարային ռազմավարական մտածելակերպը, ժողովրդի հետ շփվելու ձևերը, մեթոդները, սկզբունքները, որպեսզի իշխանության և ժողովրդի միջև անջրպետ չառաջանան, ոչ միայն գաղափարական աշխատանք, այլ նաև ժողովրդի առջև հաշվետվությունը:

«Եթե հաշվետվության արդյունքում ժողովուրդը չվստահի մեզ, տեսնի, որ ճիշտ չենք աշխատում, մեզ տեղ չի լինի կառավարման համակարգում»,- ասաց պաշտպանության նախկին նախարար Ս. Օհանյանը: