Ձեր վստահելի աղբյուրը

«Մենք հրաժարվեցինք կոալիցիա մտնելուց, որովհետև չէինք կարող մեր ծրագրերն իրականացնել, իսկ մենք ձեզ խոսք էինք տվել»: Սյունիքի մարզի Մեղրի քաղաքում ընտրողների հետ հանդիպմանը հայտարարեց «Ծառուկյան» դաշինքի ընտրական ցուցակը գլխավորող Գագիկ Ծառուկյանը:

Նա արդարացավ՝ թե ինչու չեն կարողացել իրականություն դարձնել իրենց՝ նախորդ ընտրությունների քարոզարշավին ներկայացրած ծրագրերը: 2007-ից հետո 2012-ին ավելի շատ ձայն էին հավաքել, բայց ոչ 50+1:

«Այն խոստումները, որ տվել էինք, չկարողացանք իրականացնել: Բայց որպեսզի ձեզ խաբած չլինեինք, մեր թիմակիցներին չտեղավորեցինք պաշտոնների, իհարկե առաջարկում էին՝ և նախարարներ, և մարզպետներ»,-ասաց նա:

Այս անգամ էլ ծրագիր են կազմել, ասաց՝ տեղյակ է մարդկանց խնդիրներին, գիտի լուծումները:

«Այսօր սովորական մարդկանց շատ բան պետք չի, պայման ու հնարավորություն է պետք»,-ասաց Ծառուկյանը, ավելացնելով, որ դաշինքի ներկայացրած 15 կետերը վերաբերում են բոլորին ու բոլոր ոլորտներին:

Նա նշեց, որ տարեցտարի սոցիալական վիճակը վատանում է, մարդիկ չեն կարողանում ապրել բարեկեցիկ կյանքով, աշխատում են միայն բանկերի համար:

«Մեր բոլոր առաջարկները հնարավոր է անել, անհնարին ոչինչ չկա, հարկավոր է կամենալ, ցանկանալ, ժողովրդին սիրել, նրա մասին մտածել, նրան հնարավորություն տալ»,-ասաց նա:

Անդրադառնալով այն մեղադրանքներին, թե իշխանության մարդն է, Ծառուկյանն ասաց,
«2015-ին դուք տեսաք, թե ինչ էր կատարվում պարոն Ծառուկյանի հետ: Խոսում էին, ասում էին՝ նույնն են, պայմանավորված են: Նույնը լինեի, այդպիսի բան կարո՞ղ էր լինել: Հարց եմ տալիս ձեզ, երկու տարի չեմ խառնվել քաղաքականությանը: Բայց մեր համակիրները, կուսակիցները գալով մեր տանը դեմը, ասում էին փրկի, ուրիշ ճանապարհ չկա»,-ասաց Ծառուկյանը:

Նա նշեց չէր կարող շարունակել ապրել փափուկ կյանքով՝ կողքից դիտելով, թե ինչ է կատարվում.
«Այսօր մեզ պետք է 50+1 ձայն, որ մենք կարողանանք անմիջապես լուծումներ տալ: Բոլորի լուծումը ունենք, միայն պետք է բյուջեի գումարները նպատակային ծախսվեն, ներդրումները լինեն համամասնական՝ ըստ մարզերի, գյուղերի»։

Նա կոչ արեց ներկաներին չվախենալ, սխալ ընտրության դեպքում հինգ տարի ավելի վատ է լինելու:

«Լավ բան չի կարա լինի: Ուզում եմ հասկանալ, ինչի՞ց են վախենում մարդիկ: Ասում են՝ գործից հանում են: Լավ գործից ազատում են, բայց մարդը 200-150 հազարով կարա՞ ապրի: Պետք է համակարգը փոխվի, օրենք փոխվի»,-ասաց նա: