Ձեր վստահելի աղբյուրը

«Ճգնաժամից դեպի զարգացում՝ սնվելով հաղորդակցությամբ» թեմայով ֆորումի նպատակներից մեկը ոլորտի առաջատար մասնագետների ներգրավմամբ Հայաստանի բրենդավորման գործում առաջընթաց ապահովելն է: Այս մասին այսօր լրագրողների հետ զրույցում ասաց միջոցառումը կազմակերպած Հասարակայնության հետ կապերի հայաստանյան ասոցիացիայի նախագահ Արա Սաղաթելյանը։

Նրա խոսքերով՝ արդեն մեկ ամիս առաջ Դավոսի հեռահաղորդակցության ֆորումի կայքում նշված էր, որ Հայաստանում լինելու է նման միջոցառում, մասնագետներն էլ եկել են Ժնևից, որտեղ ևս հայտարարվել է՝ «մենք գնում ենք Հայաստան»։

«Հայաստան գալու ժամանակ նրանք օդանավակայաններից իրենց Twitter-ներում,  Facebook-յան էջերում գրում են, որ գնում են Հայաստան, այսինքն՝ ինչ-որ մուլտիպլիկատիվ էֆեկտ է ստեղծվում, որի արդյունքում շատ մեծ լսարան սկսում է հասկանալ, որ կա Հայաստան, այստեղ կա մասնագիտական միջավայր և դա երկիրը ներկայացնելու ևս մեկ արդյունավետ միջոց է», - նշեց Արա Սաղաթելյանը՝ հավելելով, որ օրինակ,  ֆորումին մասնակցում է «The Huffington post»-ի ներկայացուցիչը, որի Twitter-ն ունի 1 միլիոն ընթերցող:

Լրագրողները հետաքրքրվեցին, թե արդյոք ֆորումին մասնակցող փորձագետներին հնարավոր է նաև Արցախ տանել, Արա Սաղաթելյանը  նշեց, որ այսօր հնարավոր չէ, քանի որ նրանք խիտ գրաֆիկ ունեն.
«Սակայն նրանք ունեն այնպիսի հեղինակություն, որ նրանց չես կարող վախեցնել Բելառուսից արտաքսումով»:

Արա Սաղաթելյանը նաև նշեց, որ այս հանդիպման նպատակներից մեկն էլ  փորձի փոխանակումն է, այն գործիքկազմի կիրառումը, որի միջոցով ոլորտի մասնագետները կարող են ավելի արդյունավետ իրականացնել առօրյա գործունեությունը, որակյալ և պատշաճ տեղեկատվություն հաղորդելով հասարակությանը:

Հիշեցնենք, որ Երևանում այսօր մեկնարկել է Հասարակայնության հետ կապերի հայաստանյան ասոցիացիան (APRA), Դավոսի հաղորդակցության համաշխարհային ֆորում ասոցիացիայի (World Communication Forum Association) հետ համագործակցությամբ կազմակերպված WCFDavos/Yerevan երկօրյա ֆորումը: Ֆորումի տարածաշրջանային նիստն անց է կացվում «From Crisis to Development - Powered by Communication» («Ճգնաժամից դեպի զարգացում՝ սնվելով հաղորդակցությամբ») թեմայով: