Ձեր վստահելի աղբյուրը

«Ես պարտավորվում եմ  իմ գործընկերների հետ վերադարձնել ձեզ գողացված հաղթանակն ու հաղթանակները: Դրա համար ռազմավար, գեներալ  Օհանյանը, հմուտ դիվանագետ Օսկանյանը, ամենատարբեր մարզերից տարբեր մասնագետներ միացել են ստեղծելու համար Արցախի, Հայաստանի, Սփյուռքի միացյալ ուժ, որ առաջարկելու է համապարփակ ծրագիր»,- նախընտրական քարոզարշավի շրջանակում Գյումրիում  քաղաքացիների հետ հանդիպմանն ասաց «Օհանյան-Րաֆֆի-Օսկանյան» դաշինքի պատգամավորության թեկնածու, «Ժառանգություն» կուսակցության նախագահ Րաֆֆի Հովհաննիսյանը:

Նրա խոսքով, իրենց ծրագիրը բերելու է նոր Հայաստան, իրենք պատրաստ են համագործակցելու քաղաքական բոլոր ուժերի, քաղհասարակության, շարքային քաղաքացիների հետ՝ այդ նոր Հայաստանը բերելու համար:

«Մենք պարտավոր են ժառանգելու մեր նոր սերնդին ստեղծագործ, ազատ, արդար, ամբողջական հայրենիք»,- հավելեց Ր. Հովհաննիսյանը:

«Ժառանգություն» կուսակցության առաջնորդն ասաց, որ հանձն են առնում վերադարձնել հաղթանակը, իշխանությունը սահմանադրորեն վերադարձնեն ժողովրդին, կազմակերպել ռազմավարական վերանայում բոլոր ոլորտներում՝ ներքին, հանրային, միջազգային: