Ձեր վստահելի աղբյուրը

«Հայաստանում  բիզնեսին մի քանի տարի է անհրաժեշտ եղել, որպեսզի հասկանա սոցիալական մեդիայի կարևորությունը»,- Երևանում ընթացող «Ճգնաժամից դեպի զարգացում՝ սնվելով հաղորդակցությամբ» թեմայով ֆորումի ժամանակ ասաց Smartology Digital Marketing Academy-ի  հիմնադիր Արտակ Հարությունյանը:

Նրա խոսքով, 2012 թվականին բոլոր բիզնեսներն անտեսում  էին  սոցիալական մեդիայի առկայությունն այն տրամաբանությամբ, որ՝ «ո՞ւմ է պետք, նկար եք դնում, դրանից վաճառք չեմ ունենալու»:

Փորձագետն ասաց, որ  հիմնականում օգտվում էին այն բիզնեսները, որոնք գլոբալ էին, հասկանում էին, որ  սոցիալական մեդիա գնալը որոշակի դիվիդենտներ, կանխատեսելի արդյունքներ կարող է ապահովել:

2013-ին, Ա. Հարությունյանի խոսքով,  արդեն բացեցին հաշիվներ այն տրամաբանությամբ, որ «չի խանգարում, բայց պայմանով, որ եթե վատ լինի, պետք է փակենք»:

«Իմ աչքով եմ տեսել՝ շատ բիզնեսներ բացում էին հաշիվներ, էջեր, մեկ-երկու ամիս անց փակում էին՝ ասելով, որ իզուր ծախս է, մեզ չի հետաքրքրում: Որոշներն էլ չփակեցին, փորձեցին հասկանալ, թե ինչ է: Սակայն  առաջին բացասական մեկնաբանությունից հետո սկսում էին խառնվել՝  այս ով է գրել,  գտնենք, թե ով է»,- նշեց նա:

2014 թվականին Հայաստանում սկսվել է հնարավորությունների գնահատման դարաշրջանը, երբ մարդիկ, փորձագետի խոսքով,  հասկացան, որ մեդիան պարզապես զբաղվելու  տեղ չի, հնարավորություն է և նախապես չօգտագործելը կդժվարեցնի  իրենց գործը հետագայում:

«Ովքեր շուտ օգտագործեցին, ավելի բարձր դիրքերում եղան, դիվիդենտներ ստացան հետագա բիզնես առաջխաղացման համար»,- ասաց փորձագետը:

Ա. Հարությունյանի խոսքով, 2015-ին սոցիալական մեդիան, մասնավորապես Ֆեյսբուքը, սկսեցին ընկալել որպես էժան գովազդային ալիք, բացի այդ,  սովորական մեդիա ալիքներից տարբերվում էր իր արագությամբ:

«2016-ին բոլոր բիզնեսները հասկացան, որ Հայաստանում նույնպես եթե օն-լայն լսարանում ներկայացված չես, մարդկանց համար պարզապես որպես բիզնես գոյություն չունես, որովհետև մարդիկ որևէ բիզնեսի մասին տեղեկանալու համար անմիջապես Ֆեյսբուքում են սկսում փնտրել, հետո նոր Գուգլում»,- ասաց նա:

Ա. Հարությունյանի ներկայացմամբ, 2017-ին սոցիալական մեդիան արդեն հասկացված է բիզնեսների համար:

«Եթե ժամանակին սոցիալական մեդիան դիտարկվում էր տարբեր ռակուրսներից, այժմ բիզնես սեփականատերերը հասկանում են սոցիալական մեդիայի ուժը», -նշեց նա:

Հիշեցնենք, որ Երևանում անցկացվում է Հասարակայնության հետ կապերի հայաստանյան ասոցիացիան (APRA), Դավոսի հաղորդակցության համաշխարհային ֆորում ասոցիացիայի (World Communication Forum Association) հետ համագործակցությամբ կազմակերպված WCFDavos/Yerevan երկօրյա ֆորումը: Ֆորումի տարածաշրջանային նիստն անց է կացվում «From Crisis to Development - Powered by Communication» («Ճգնաժամից դեպի զարգացում՝ սնվելով հաղորդակցությամբ») թեմայով: