Ձեր վստահելի աղբյուրը

Սպանդանոցային պարտադիր մորթի կիրառման՝ կառավարության որոշմամբ հաստատված ժամանակացույցի համաձայն, պետական գնումներով սպանդանոցային ծագման մսի ձեռքբերումը պարտադիր է 2017 թվականի մայիսի 1-ից, իսկ Երևան քաղաքի տեղական սպանդանոցային ծագման մսի առևտրի իրականացման վայրերում՝ 2018 թվականի մարտի 1-ից:

Հանրապետությունում գործող սպանդանոցների սեփականատերերի և խոշոր իրացման ցանցերի ներկայացուցիչների մասնակցությամբ այսօր ՍԱՊԾ-ում կազմակերպվել է քննարկում: Ծառայության պետ Իշխան Կարապետյանը նշել է, որ գործընթացը պետք է սկսել արդեն այսօրվանից՝ սահուն անցում կատարելու և իրացման ցանցերին առավելագույնս պատրաստվելու հնարավորություն ընձեռելու նպատակով:

ՍԱՊԾ մամուլի ծառայության հաղորդմամբ, սպանդանոցների  սեփականատերերի հետ Ծառայությունն արդեն իսկ անց է կացրել տարբեր ձևաչափերով մի քանի հանդիպումներ՝ տեղեկացնելով բոլոր պահանջների ու պայմանների մասին, միաժամանակ՝ լսելով հնարավոր խնդիրների մասին և առաջարկելով լուծումներ:

Աղբյուրի հաղորդմամբ, մի քանի սպանդանոցներ արդեն իսկ պատրաստակամություն են հայտնել ապահովել իրացման ցանցներին սպանդանոցային ծագման մսով: Նախնական պայմանավորվածություններ են ձեռք բերվել նաև անցումը կատարելու ժամկետների շուրջ:

Ծառայության պետն ընդգծել է, որ մսի շուկայի կարգավորումը համալիր մոտեցում է պահանջում, և՝ որ աշխատանքներ են տարվում բոլոր փուլերում՝ մորթից մինչև իրացում, այդ շղթայում հատուկ ուշադրություն դարձնելով նաև անասնաբուժասանիտարական փորձաքննության որակին:

«Պահանջեք, որ թե մատակարարը, թե անասնաբուժասանիտարական փորձաքննություն իրականացնող ՍՊԸ-ները չխախտեն սահմանված պահանջները: Եթե մեր բոլորի պահանջը թիմային լինի, մեզ կհաջողվի փոփոխություն կատարել»,-նշել է ՍԱՊԾ պետը:

Հանդիպման մասնակիցներին նաև տեղեկացվել է,  որ առաջիկայում թարմ միս և մսեղիք, ինչպես նաև հաց-հացաբուլկեղեն տեղափոխող փոխադրամիջոցների սանիտարական անձնագրեր ունենալու պահանջը պարտադիր է դառնալու, միաժամանակ վերահսկվելու է, որ դրանք տեղափոխող անձինք ևս ունենան սանիտարական գրքույկներ: Ծառայությունը նաև նախատեսել է հատուկ պիտակ, որը կփակցվի փոխադրամիջոցի վրա և կհավաստի, որ այն համապատասխանում է տվյալ սննդամթերքի տեղափոխմանը ներկայացվող պահանջներին:

ՍԱՊԾ-ն ներդնում է հանրային իրազեկման մեկ այլ նոր գործիք. մսի շուկայում գործող այն տնտեսավարողները, որոնց գործունեությունը պետական վերահսկողության արդյունքում դրական կգնահատվի և որոնք կդիմեն Ծառայություն, կարող են ստանալ այդ մասին հավաստող պիտակներ և, սպառողներին տեղեկացնելու նպատակով, փակցնել դրանք մսի իրացման վայրում: