Ձեր վստահելի աղբյուրը

Hraparak-ն այսօր գրել է  պաշտպանության բանակի նախկին հրամանատար Սամվել Բաբայանի ձերբակալության մասին, մինչդեռ Բաբայանի ձերբակալության մասին Ազգային անվտանգության ծառայությունը լռում է. պաշտոնական հաղորդագրություն առայժմ չկա։ Ծառայության մամուլի քարտուղարն էլ  հեռախոսազանգերին չի պատասխանում:

Սամվել Բաբայանի հեռախոսահամարն անհասանելի է: ՕՐՕ դաշինքի անդամ Արեգնազ Մանուկյանն ասաց, տեղեկություններ չունի:

Ավելի վաղ ԱԱԾ մամուլի կենտրոնից հայտնել էին, որ մարտ ամսին ՀՀ Ազգային անվտանգության ծառայությունում նախնական տեղեկություններ են ստացվել ՀՀ քաղաքացիների կողմից Վրաստանի Հանրապետությունից մաքսանենգ եղանակով Հայաստանի Հանրապետություն  «Իգլա» տեսակի զենիթա-հրթիռային համալիր տեղափոխելու մասին։

Ձեռնարկված քննչական գործողությունների և օպերատիվ-հետախուզական միջոցառումների արդյունքում հայտնաբերվել և առգրավվել է «Իգլա» տեսակի զենիթա-հրթիռային համալիրի արձակման խողովակ՝  «9M39» հրթիռով։

Դեպքի առթիվ 2017թ. մարտի 22-ին ՀՀ Ազգային անվտանգության ծառայության քննչական վարչությունում ՀՀ քրեական օրենսգրքի 235-րդ 2-րդ մասի և 235.1-րդ  հոդվածի 2-րդ մասի 1-ին կետի հատկանիշներով հարուցվել է քրեական գործ։

Հանցանք կատարելու մեջ անմիջականորեն ծագած կասկածանքի հիման վրա երկու անձ ձերբակալվել է։