Ձեր վստահելի աղբյուրը

Երևանում աշխատանքն է շարունակում Դավոսի Հաղորդակցության համաշխարհային ֆորումի տարածաշրջանային նիստը՝ WCFDavos/Yerevan: «Ճգնաժամից դեպի զարգացում՝ սնուցվելով հաղորդակցությամբ» խորագրով միջոցառմանը այսօր կքննարկվեն երկրի բրենդինգի և համայնքային զարգացման խնդիրներ, որոնց ժամանակ ելույթ կունենան ինչպես հայ, այնպես էլ աշխարհի տարբեր երկրներից ժամանած առաջատար փորձագետներ:

Նախքան քննարկումները Huffington Post «Twitter Powerhouses Series»-ի համահիմնադիր Շոն Գարդները սոցիալական մեդիայի մասին հատուկ ելույթ ունեցավ։ Նա նշեց, որ սոցիալական ցանցերը մարդկանց կապում են իրար հետ, համագործակցության հնարավորություն տալիս:

«Համագործակցությունը, կոլեկտիվ աշխատանքը շատ կարևոր է: Համատեղ աշխատանքի արդյունքում ավելի մեծ բաների կարելի է հասնել: Կարևոր է՝ մենք, մենք, մենք-ը, ոչ թե ես, ես, ես-ը: Ես-ը չի աշխատում»,- նշեց  Գարդները:

Նրա կարծիքով, թափանցիկությունը խորացնում է հարաբերությունները:

Հարցին՝ սոցիալական մեդիայի հետ կապված  լավագույն խորհուրդները որո՞նք են, նա ասաց, իր համար  առաջին լավագույն գործիքը Ինսթագրամն է:  Քարոզարշավի շրջանում, նրա խոսքով, կարելի է շատ նկարներ տեղադրել, օգտագործել մի քան «հեշթեգեր»:

«Երբեք մի վախեցեք ամեն օր ինֆորմացիա զետեղելուց, մի քանի «հեշթեգ» օգտագործելուց:  Ֆեյսբուքը, Ինսթագրամը  օգտագործեք միաժամանակ»- ասաց Շ. Գարդները:

Հիշեցնենք, որ մարտի 21-ին մեկնարկեց WCFDavos/Yerevan երկօրյա  ֆորումը, որը կազմակերպվել է Հասարակայնության հետ կապերի հայաստանյան  ասոցիացիայի (APRA) և Դավոսի հաղորդակցության համաշխարհային ֆորում  ասոցիացիայի (World Communication Forum Association) համատեղ ջանքերով:

Տարածաշրջանում իր ձևաչափով առաջին անգամ անցկացվող ֆորումի շրջանակներում երեկ քննարկումներ են անցկացվել ճգնաժամային հաղորդակցության, սոցիալական մեդիաների, կորպորատիվ պատասխանատվության խնդիրների վերաբերյալ: