Սևանա լճի ամբողջ տարածքը կգույքագրվի, կստեղծվի հատուկ հարկային զոնա. վարչապետ
Սևանա լիճը և հարակից տարածքներն ունեն ոչ միայն բնապահպանական և սոցիալական առանցքային նշանակություն, այլ նաև լուրջ տնտեսական ներուժ՝ հատկապես զբոսաշրջության զարգացման տեսանկյունից: Մինչդեռ, ինչպես կառավարության այսօրվա նիստում ասաց ՀՀ վարչապետ Կարեն Կարապետյանը, այսօր այդ տարածքները ոչ միշտ են արդյունավետ օգտագործվում՝ հաշվի առնելով գործող օրենսդրությամբ Սևանա լճի և հարակից տարածքներին տրված հատուկ կարգավիճակը ու Կայուն զարգացման անհրաժեշտությունը:
Այդ նպատակով վարչապետը հանձնարարեց ՀՀ տարածքային կառավարման և զարգացման նախարարին և գործադիր բոլոր շահագրգիռ մարմինների ղեկավարներին, երկամսյա ժամկետում քննարկել և Կառավարության աշխատակազմ ներկայացնել ՀՀ Գեղարքունիքի մարզի 2017-2020 թթ-ի զարգացման ռազմավարություների նախագիծը՝ շեշտադրելով տնտեսական բաղադրիչի բնապահպանական բացառիկ դերն ու նշանակությունը:
Բացի այդ, Կարեն Կարապետյանը հանձնարարեց ՀՀ ֆինանսների, Տնտեսական զարգացման և ներդրումների նախարարներին մեկամսյա ժամկետում կառավարության աշխատակազմ ներկայացնել «Սևան» ազգային պարկի տարածքում տնտեսական գործունեության իրականացման հատուկ կարգավիճակի վերաբերյալ առաջարկություններ, այդ թվում՝ նախատեսելով գույքահարկով հարկման մեխանիզմների և հարկային քաղաքականության վերաբերյալ ճկուն մոտեցում:
Միաժամանակ վարչապետը ՀՀ տնտեսական զարգացման ու ներդրումների նախարարին հանձնարարեց մեկամսյա ժամկետում Տարածքային կառավարման և զարգացման նախարարություն ներկայացնել առաջարկություններ, մասնավորապես, «Սևան» ազգային պարկի տարածքում զբոսաշրջային զարգացմանն ուղղված հատուկ ծրագիր և գործողությունների պլան, իսկ ՀՀ բնապահպանության նախարարին էլ հանձնարարեց երկամսյա ժամկետում մշակել ու ներկայացնել Սևանա լճում ձկնային ռեսուրսների վերականգնման և կայուն օգտագործման գործողությունների պլան՝ հստակ ժամանակացույցով և չափելի ցուցանիշներով:
«Ուսումնասիրել և ներկայացնել առաջարկություներ «Սևան» ազգային պարկի տարածքում կենսոլորտային արգելոցի ստեղծման հիմքերի վերաբերյալ»,- ասաց վարչապետը:
Կարեն Կարապետյանը Գեղարքունիքի մարզպետին էլ հանձնարարեց մեկամյսա ժամկետում քաղաքաշինության պետական կոմիտեին տրամադրել ներդրումային ծրագրերի իրականացման համար նպատակահարմար գոտիներում փաստացի իրավիճակի վերաբերյալ տեղեկատվություն:
Հաջորդ հանձնարարականն էլ ուղղված էր Քաղաքաշինության պետական կոմիտեի նախագահին, մասնավորապես, երկմասյա ժամկետում ներկայացնել առաջարկություններ «Սևան» ազգային պարկի կենտրոնական գոտում ներդրումային ծրագրերի իրականացման համար նպատակահարմար գոտիների առանձնացման վերաբերյալ՝ հիմք ընդունելով Սևանա լճի կենտրոնական գոտում կառուցապատման համար նախատեսված տարածքների գոտեվորման նախագիծը:
Կարեն Կարապետյանը մեկնաբանեց իր այս հանձնարարականը։
«Սևանա լճի ամբողջ տարածքը գույքագրում ենք, բազմաթիվ ակտիվներ կան, որոնք չեն աշխատում, դրա համար հատուկ հարկային զոնա ենք ստեղծելու, որտեղ պրոգրեսիվ հարկերով դրդելու ենք ակտիվ ունեցող մարդկանց գործ անել: Բացի այդ, Սևանի հանգստյան ժամկետը երկարացնելու առումով բոլոր խնդիրները գոտիավորելու ենք և որպես ուղեցույց տալու ենք պոտենցիալ ներդրողներին»,- ասաց վարչապետը:
Նա նաև հանձնարարեց, որ վարձատրությամբ տրված բոլոր այն տարածքների հարցը, որոնք յուրաքանչյուր մարդ իր քմահաճույքից կամ ճաշակից ելնելով ցանկապատում է, կարգավորել:
«Պետք է շատ խիստ այդ հարցը կարգավորել», - նշեց Կարեն Կարապետյանը։
Վարչապետը Բնապահպանության նախարարին հանձնարարեց, որ եթե «Սևան» ազգային պարկի տնօրենն այդ բեռը չի քաշելու, ապա ներկայացնի նոր տնօրենի նշանակման վերաբերյալ առաջարկություն։
«Իրականում ամբողջը նայել եմ, մեծ ներուժ ունենք: Բազմաթիվ շենքեր կան, նորմալ ներդրողներ կան, նորմալ պայմաններ է պետք ստեղծել, որ այդ ամենը աշխատի»,- ընդգծեց Կարեն Կարապետյանը:
Լրահոս
Տեսանյութեր
ՈւՂԻՂ. Տրանսպորտը թանկացնում են նախկինների մերժած հաշվարկով. Պիպոյանը փաստաթղթեր է հրապարակում
