Ձեր վստահելի աղբյուրը

«Չպետք է մոռանանք, որ գյուղն ազգային ավանդույթների, ժողովրդագրական աճի, հայրենի սահմանների պաշտպանության, մշակույթի պահպանման շտեմարանն է։ Հայրենիքը, նախևառաջ, հողն է, գյուղն է։ Չկա գյուղ, չկա հայրենիք»: Գյուղատնտեսության ոլորտում ձեռնարկելիք առաջնահերթ 13 քայլերը նշելուց առաջ ծրագրում հիշեցնում է Կոնգրես-ՀԺԿ ծրագիրը: 

Դաշինքի մասնագետները ծրագրում արձանագրում են. «Դեպի Ռուսաստան ու դեպի Երևան միգրացիայի պատճառով ՀՀ 850 գյուղական բնակավայրերից 370-ը կանգնած են իսպառ վերացման վտանգի առաջ։ Այս պրոցեսները խրախուսվեցին 2001թ. հողային օրենսգրքի ընդունումից հետո, երբ քաղաքային օլիգարխները գյուղերում ստացան ավելի մեծ իրավունքներ, քան գյուղացիներ»:

Դաշինքն առաջարկում է անհապաղ իրականցնել գյուղատնտեսական մթերքների արտադրության սուբսիդավորում, փոքր գյուղացիական տնտեսությունների խրախուսում,  մեծածախ շուկաների ստեղծում,  Գյուղացիական տնտեսությունների կողմից մանրածախ շուկաների հիմնում, գյուղացիական տնտեսության վարկային պարտքերի դուրս գրում կամ մասնակի մարում, սերմացուի, թունաքիմիկատների, պարարտանյութերի նկատմամբ տարբերակված ԱԱՀ կիրառում,  ոռոգման համակարգի բարեփոխում, գյուղացիների համար մասնագիտական պետական դասընթացների կազմակերպում, գյուղմթերքների թափոնների պետական հաշվառում և այլն:

Օհանյան-Րաֆֆի-Օսկանյան դաշինքը ծրագրում առաջարկում է գյուղատնտեսության բնագավառում հարկային մեղմ քաղաքականության կիրառմամբ բարձրացնել արտադրության արդյունավետությունն ու իջեցնել ինքնարժեքը, ինչն էլ կնպաստի երկրի պարենային անվտանգության ապահովմանը:

«Ոլորտի զարգացման, պարենային անվտանգության ապահովման և աղքատության կրճատման համար վճռորոշ նշանակություն ունի ոռոգելի երկրագործության համակարգի ներդրումը: Գետահոսքերի առավել հարմար տեղամասերում հիդրոէլեկտրակայանների և ջրամբարների կառուցմամբ պետք է հասնել ՀՀ ջրային պաշարների ամբողջական վերահսկողության:
Էլեկտրաէներգիա արտադրելու նպատակով օգտագործված ջրերը հարկ է ինքնահոս համակարգով մատակարարել գյուղացիական տնտեսություններին, ինչը որոշակիորեն կլուծի անջրդի հողատարածքների յուրացումն ու ոռոգման հիմնախնդիրները:
Գյուղատնտեսության ոլորտում կուսակցությունը կարևորում է նաև ապահովագրական համակարգի ներդրումը սկզբում կամավորության, ապա պարտադիր սկզբունքով»,-մասնավորապես առաջարկում է ՕՐՕ-ն:

ՀՅԴ ծրագրում նշված է. «Աջակցել հայրենական արտադրողին: Մեր շատ ձեռնարկություններ չեն դիմանում արտասահմանյան արտադրողների ու ներմուծողների հետ մրցակցությանը՝ վերջիններիս կողմից իրականացվող գնագցման ոչ ազնիվ քաղաքականության պատճառով: Հայ գյուղացին չի կարողանում վաճառել իր արդար քրտինքով աճեցրած բերքը, քանի որ օտար ապրանքով ողողված է մեր երկիրը: Պետությունը պետք է մտածի իր արտադրողի մասին: Ներդնել ջրային ռեսուրսների ավտոմատ կառավարման համակարգեր, ընդլայնել ամբարվող ռազմավարական ջրային պաշարները»:
 

«Ծառուկյան» դաշինքի ծրագրում կարևոր տեղ է հատկացվում գյուղատնտեսական տոկոսադրությքների նվազեցմանըմ որի մասին բոլոր հանդիօումներում բարձրաձայնումէ  դաշինքի համապետական ցուցակը գլխավոր Ծառուկյանը:

« Հանրապետությունում գործող շուրջ 320 հազ. գյուղացիական տնտեսությունների գերակշիռ մասը «վարկերի տակ են», իսկ դրանց սուբսիդավորումն աննշան է: Պետության կողմից վարկավորել և խրախուսել գյուղատնտեսական արտադրությամբ զբաղվող անհատներին և ընկերություններին: Գյուղատնտեսական վարկերի տոկոսը չպետք է գերազանցի 3-5 %-ի շեմը»,-ասված է ծրագրում:

 Բացի այդ դաշինքի մասնագետներն առաջարկում են, գյուղատնտեսական մթերքների արտադրության և իրացման գործընթացում իրականացնել լիակատար աջակցության քաղաքականություն, յուրաքանչյուր տարածաշրջանի համար կառավարության կողմից հաստատել հատուկ պետական ծրագրեր՝ հաշվի առնելով հանրապետության բնակլիմայական պայմանները և գյուղմթերքների արտադրության առանձնահատկությունները,գյուղացիական տնտեսությունների համար տարեկան 1 հա հողամասի ոռոգման ջրի դիմաց վճար սահմանել 1000 ՀՀ դրամ:

Ելք դաշինքը  գյուղատնտեսության ոլորտում նորարարական մոտեցումների կողմնակից է: Այսպես, այն գյուղացիական տնտեսությունները, որոնք կանցնեն կաթիլային ոռոգման, հինգ տարի ժամկետով կազատվեն ոռոգման ջրի վարձից:

Ծրագրում ներառել է քայլեր, որոնք կխթանեն տեղական հակակարկտային կայանների արտադրությունը. «Հակակարկտային ցանցերի արտադրությունը և վաճառքը կազատվեն ԱԱՀ-ից. ցանցապատված այգիները հինգ տարի կազատվեն հողի հարկից: Պետությունը կխրախուսի գյուղացիական ճյուղային ասոցիացիաների ստեղծումը: Կստեղծվեն բացառապես օրգանական մթերքի արտադրության փորձարարական կենտրոններ, որոնց խնդիրը կլինի իրականացնել բուսաբուծություն՝ առանց քիմիական պարարտանյութերի:

Մինչև երկու տարվա գործարանային արտադրության 8 գյուղատնտեսական տեխնիկայի ներմուծումը և վաճառքը երկու տարի ժամկետով կազատվեն մաքսատուրքից և ԱԱՀ- ից: Կստեղծվեն արագ փչացող գյուղմթերքի նախնական վերամշակման կենտրոններ, որոնք հնարավորություն կտան գյուղմթերքը պահեստավորել կիսաֆաբրիկատ վիճակում և իրացման ավելի ձեռնտու հնարավորություններ կստանան»,-ասված է «Ելք»-ի ծրագրում: