Ձեր վստահելի աղբյուրը

«Ելք» դաշինքն իր նախընտրական ծրագրում որպես տնտեսության զարգացման հիմնական ճյուղեր՝  առանձնացրել է  բարձր տեխնոլոգիաներն ու  արդյունաբերությունը: Այս մասին այսօր «Այլընտրանք» հետազոտական կենտրոնի կազմակերպած «ՀՀ ԱԺ ընտրությունների տնտեսական խոստումները» թեմայով քննարկման ժամանակ ասաց դաշինքի ներկայացուցիչ Գևորգ Գորգիսյանը:

Նրա խոսքերով՝ բարձր տեխնոլոգիաների ոլորտի զարգացման համար Հայաստանն ունի բոլոր ռեսուրսները, բայց կան նաև խոչընդոտներ: Դրանցից մեկը, ըստ նրա,  կրթության համակարգն է, որը շատ թույլ է ու չի համապատասխանում ներկայիս շուկայի պահանջներին:

«Կրթության ոլորտում պետք է կատարվեն լուրջ բարեփոխումներ, որպեսզի բուհն ավարտած ուսանողներն արդեն իսկ պատրաստ լինեն մտնել աշխատաշուկա »,- ասաց Գևորգ Գորգիսյանը:

Ինչ վերաբերում է արդյունաբերությանը, «Ելք»  դաշինքի ներկայացուցիչն ասաց, որ  Հայաստանը հումք արտահանող երկրից պետք է վերածվի ապրանք արտահանող երկրի:

«Մասնավորապես, Սյունիքի մարզում կսահմանվեն հարկային արտոնություններ մետաղաձուլական ընկերությունների համար: Զարկ կտրվի նաև քիմիական  արդյունաբերությանը, որի արդյունքում հումքից կստանանք վերջնական արտադրանք ու կարտահանենք: Նախատեսում ենք կարճ ժամանակահատվածում կառուցել Կապանից  Իրան գնացող երկաթգիծ, որը կապահովի արտահանումները Իրան», - նշեց  Գևորգ Գորգիսյանը:

Գյուղատնտեսության ոլորտում, ըստ նրա, առաջարկում են ներդնել նորագույն տեխնոլոգիաներ:  Օրինակ՝ կաթիլային ոռոգման ներդրման դեպքում գյուղատնտեսները կազատվեն եկամտային հարկից, կստեղծվեն պետական կառույցներ, որոնք կապահովեն սննդամթերքի  պահեստավորումը: 

Գևորգ Գորգիսյանը միաժամանակ նշեց, որ այդ դրույթները կիրակագործվեն միայն այն դեպքում,  եթե մենաշնորհների և կոռուպցիայի դեմ պայքար մղվի: