Ձեր վստահելի աղբյուրը

«Այլընտրանք» հետազոտական կենտրոնի նախաձեռնությամբ այսօր տեղի ունեցավ «ՀՀ ԱԺ ընտրությունների տնտեսական խոստումները»  թեմայով քննարկում, որին մասնակցում էին քաղաքական ուժերի ներկայացուցիչներ, ճանաչված տնտեսագետներ:

«Ծառուկյան» դաշինքի ներկայացուցիչ, տնտեսագետ Վարդան Բոստանջյանը ներկայացնելով  իրենց նախընտրական ծրագրի տնտեսական բաղադրիչները, նշեց, որ  ամենակարևոր դրույթներն են՝ պետական կառավարման համակարգի համեմատական վերափոխումը, դրա արդյունավետության բարձրացման ուղիների ձևավորումը, բնակչության եկամուտների  բևեռացվածության աստիճանի մեղմումը, տնտեսական գործունեության համակողմանի  խթանումը, ինչպես նաև՝ կնճռոտ, գրեթե կենցաղային բնույթ կրող խնդիրների հնարավորինս  շուտափույթ լուծումը: 

«Կարծում եմ, որ մեր դաշինքն այս պահի դրությամբ կարող է լուծել իր առաջադրած խնդիրները: Ես երբեմն զարմանում եմ, որ քաղաքական ուժերը նսեմացնում են որոշ ուժերի ծրագրերը: Սա մեր երկիրն է, բոլորս էլ մի քիչ տարբերությամբ  նախընտրական ծրագրերում գրեթե նույն խնդիրներն ենք ներկայացնում: Այսօր այնքան կենցաղային խնդիրներ կան, որ եթե դրանք լուծված չեն երկրում, ուրեմն նշանակում է, որ կառավարման համակարգում արմատական փոփոխությունների կարիք ունենք»,- ասաց Վարդան Բոստանջյանը:

Տնտեսագետները հետաքրքրվեցին, թե «Ծառուկյան» դաշինքն իր ծրագրում առաջարկում է կանխել արտագաղթը, ստեղծել նոր աշխատատեղեր, ինչի հաշվին է այդ ամենն անելու: 

Վարդան Բոստանջյանը նշեց, որ համազգային, տնտեսական անվտանգության տեսանկյունից, արտագաղթը բացասական երևույթ է, ուստի պետք է առաջին հերթին այնպիսի քայլեր ձեռնարկեն, որ կանխեն կամ մեղմեն արտագաղթը: Միակ ճանապարհը, ըստ նրա, աշխատատեղերի ստեղծումն է, քաղաքացին պետք է ունենա աշխատանք՝ թեկուզ զուսպ եկամուտով, որի դեպքում արտագաղթը հնավորինս կնվազի:

«Բացառված է, որ մարդիկ իրենց ծննդավայրից ուղղակի հեռանան, գնում են միայն պարտադրված, երբ ապրուստի միջոցներ չունեն»,- ասաց նա:

Նրա խոսքերով՝ պետք է նվազեցնել պետական ծախսերն ու այդ գումարներն ուղղել այլ ճյուղերի զարգացմանը: 

«Ես հասկանում եմ, որ աղքատը իրեն պետք է աղքատի նման պահի: Մեր երկիրը պետք է հնարավորություններն այդքան ճոխ չօգտագործի: Օրինակ՝ 1990 թվականին պետական կառավարման համակարգի պահպանության ծախսերը կազմում էին 7 տոկոս, իսկ այսօր՝ 21%, իսկ ոչ բացահայտ ծախսերը՝ 9%, այսինքն՝ բյուջետային ծախսերի մեկ երրորդը կառավարման համակարգը ծախսում է իր վրա: Ինչի՞ եք ճոխ բազկաթոռի վրա նստում, տաբուրետկայի վրա նստեք, ոտքով գնացեք աշխատանքի»,- նշեց Վարդան Բոստանջյանը՝ միաժամանակ հավելելով, որ ինքն էլ է ժամանակին այդ մեքենաներից օգտվել, բայց միշտ մտածել է ՝ ինչո՞ւ:

Ըստ նրա՝ զարգացած երկրներում նման ծախսեր չեն անում, ուստի ժամանակ է այդ ճոխ ծախսերը կրճատել:

«Պետական կառավարման համակարգում հանգրվանած բազմաթիվ ծույլ մարդիկ կան ու մենք դա կոչում ենք աշխատատեղ: Երկրին պետք է աշխատատեղ, որտեղ գտնվողն արդյունք է ստեղծում», - ընդգծեց Վարդան Բոստանջյանը:

Անդրադառնալով հարցին, թե  «Ծառուկյան» դաշինքը ինչի հաշվին է պատրաստվում 2018 թվականին ապահովել 6 տոկոս տնտեսական աճ, Վարդան Բոստանջյանն արձագանքեց. «Հայաստանը շնչի, արտաշնչի՝ 6 տոկոսն էդ ի՞նչ աճ է, որ չապահովի: Ես հասկանում եմ՝ ինչ է կատարվում, զգալով, որ «Ծառուկյան» դաշինքը հրապուրիչ ու գրավիչ է հասարակության համար, այլ ուժերը փորձում են մեզ նսեմացնել, դա ծիծաղելի է: Իսկ տնտեսական աճը կապահովենք աշխատանքի հաշվին, օրինակ՝ հանքարդյունաբերության ոլորտում»: