Ձեր վստահելի աղբյուրը

«Իզվեստիա» թերթին տված հարցազրույցում ՌԴ-ում Հայաստանի նորանշանակ դեսպան Վարդան Տողանյանը հայտնել է, որ շուտով տեղի է ունենալու հայ-ռուսական միջկառավարական հանձնաժողովի նիստը:

Գնահատելով Ռուսաստանի և Հայաստանի միջև 25 ամյա դիվանագիտական հարաբերությունները, դեսպան Տողանյանը նշել է, թե՝ իրականում հայ-ռուսական հարաբերությունները ոչ թե 25, այլ 300 տարվա պատմություն ունեն:

«Քառորդ դարյա ժամանակահատվածում մենք հասել ենք ռազմավարական գործընկերության մակարդակի: Այդ ընթացքում Ռուսաստանի և Հայաստանի հարաբերությունները վերջնականապես ձևավորվեցին և ամրացան: Այս ժամանակահատվածում ստորագրվել են երկկողմ համաձայնագրեր և պայմանագրեր գործնականում բոլոր պետական կառույցների և գերատեսչությունների միջև»,- նշել է դեսպանը և ընդգծել, որ Հայասատնի և Ռուսաստանի տարբեր տարածաշրջանների միջև համագործակցությունը նույնպես զարգանում է:

ՌԴ-ում որպես Հայաստանի դեսպան, իր աշխատանքային գործունեության մեջ  հատուկ տեղ է զբաղեցնելու «հասարակական ծանրաբեռնվածությունը»:

«Ես դեսպան նշանակվեցի նախագահ Սերժ Սարգսյանի ՌԴ պաշտոնական այցից երկու օր առաջ: Եվ առաջին իսկ օրվանից սկսեցի զբաղվել նախագահի այցելության կազմակերպչական աշխատանքներով: Հայկական ընկերությունները շատ նախագծեր և գաղափարներ ունեն Ռուսաստանում աշխատելու ուղղությամբ: Մեր կողմից մենք կնպաստենք այդ նախագծերի բարձր մակարդակով քննարկումներին: Հասարակական բեռնվածությունը հատուկ տեղ է զբաղեցնելու իմ աշխատանքում: Ակտիվորեն մասնակցելու եմ մշակութային և մարդասիրական նախագծերին և գործողություններին, որոնք վերաբերում են հայ-ռուսական հարաբերությունների պատմությանը: Ի դեպ, այս տարի հոբելյանական է, եթե կարելի է այդպես անվանել։ Հայ Առաքելական եկեղեցու Ռուսական և Նոր Նախիջևանյան թեմն արդեն 300 տարի է գործում է Ռուսաստանում»,- նշել է դեսպանը և հավելել, որ իրենք ակտիվորեն մասնակցում են այդ օրվան նվիրված միջոցառումների կազմակերպման աշխատանքներին:

Անդրադառնալով ԵԱՏՄ-ին Հայաստանի անդամակցությանը, մասնավորապես հարցին, թե՝ բավարարում է եվրասիական ինտեգրացիոն ուղու ընտրությունը, դեսպանը նշել է, որ Հայաստանը ԵՄ-ի հետ էլ ասոցացման համաձայնագրի շուրջ բանակցել է, սակայն գիտակցված կատարել է ԵԱՏՄ-ին անդամակցելու ընտրությունը:

«Եթե նայենք վիճակագրությանը, ապա ԵԱՏՄ-ին անդամակցելուց հետո ունենք ապրանքաշրջանառության նշանակալի աճ: Դեռ շատ տարիների աշխատելու տեղ ունենք նոր միության ձևավորման գործում, առավել ևս Հայաստանի համար, որը ընդհանուր սահման չունի Ռուսաստանի հետ և Ադրբեջանի ու Թուրքիայի կողմից գտնվում է անօրինական շրջափակման մեջ: Պետք է հասկանալ, որ ստեղծվել է վերազգային կազմակերպություն: Մի խոսքով, Հայաստանը գոհ է իր ընտրությունից»,- նշել է դեսպանը:

Արցախի հիմնահարցին անդրադառնալով դեսպան Տողանյանը հայտարարել է, որ հակամարտության լուծումը հնարավոր է միայն քաղաքական և դիվանագիտական ճանապարհով: 1994թ.-ին զինադադարի եռակողմ համաձայնագրի ստորագրումից ի վեր, հակված է հակամարտության կարգավորման դիվանագիտական ճանապարհին:

«Դուք տեսնում եք, թե ինչ է կատարվում շփման գծում, ինչպես նաև հայ-ադրբեջանական սահմանին: Երևում է, որ մեր գործընկերները այնքան էլ պատրաստ չեն քաղաքական ճանապարհով կարգավորման: Երևանը իր հերթին իր շնորհակալությունն է հայտնում Ռուսաստանին միջնորդական առաքելության ցուցաբերման, ինչպես նաև քաղաքական և դիվանագիտական ճանապարհով խնդրի կարգավորման ամուր դիրքորոշում ունենալու համար»,- նշել է Տողանյանը:

ՀԱՊԿ-ի շրջանակներում հայ-ռուսական ռազմատեխնիկական հարաբերություններում դեսպանը ակտիվություն է նկատում. «Այժմ Երևանը թարմացնում է իր սպառազինությունը և ակտիվացնում է Ռուսաստանի հետ կոոպերացիան: Իհարկե ամեն ինչ չէ, որ հարթ է, ինչպես կցանկանայինք, սակայն չնայած մի շարք տեխնիկական հարցերի, կարծում եմ, այս ոլորտում երկկողմ հարաբերությունները շատ բարձր են»:

Անդրադառնալով ՀՀ նախագահ Սերժ Սարգսյանի ՌԴ կատարած այցին դեսպանը այն գնահատել է «հագեցած  և արդյունավետ». Քննարկվել է հարցերի լայն շրջանակ՝ սկսած մարդասիրական և տնտեսական հարցերից, վերջացրած՝ ռազմատեխնիկական համագործակցությամբ: