Ձեր վստահելի աղբյուրը

«Մենք հայտարարել ենք, որ 2017-ը լինելու  է ախտորոշման, սանիտարիզացիայի՝ մաքրման, պետական կառավարման համակարգի բարեփոխումների, ինչպես նաև  ստաբիլացման տարի»,- այս մասին այսօր Արագածոտնի մարզում ընտրողների հետ հանդիպման ժամանակ ասաց ՀՀԿ նախագահի առաջին տեղակալ,  վարչապետ Կարեն Կարապետյանը:

Նրա խոսքերով՝ բոլոր ոլորտներում առկա խնդիրները, հիվանդությունները գույքագրել են:

«Մենք եկել ենք այն եզրակացության, որ բոլոր ոլորտներում՝ գյուղատնտեսություն, առողջապահություն, բիզնես, արդարադատություն, տեղական կառավարման համակարգ և այլն, ունենք արդյունավետության պակաս, ինչը դրդում է մեզ բոլոր ոլորտներում փոփոխություններ և բարեփոխումներ կատարել»,- նշեց Կարեն Կարապետյանը:

Անդրադառնալով  պետական կառավարման համակարգի բարեփոխումներին, վարչապետն ասաց, որ կառավարման ոլորտում ամեն օր անցնում են ավելի ճկուն արդյունավետ համակարգի:

«Կառավարման համակարգում ամեն ինչ անում ենք, որ քաղաքացու շփումը պետական ծառայողի հետ մինիմիումի հասցվի»,- ասաց վարչապետը՝ հավելելով, որ բարեփոխումներ են իրականացնում նաև հարկային և մաքսային ոլորտներում:

Տնտեսական բարեփոխումներից էլ առանձնացրեց՝ վերաֆինանսավորման տոկոսադրույքի նվազեցմանն ուղղված քայլերը, Իրանի հետ սահմանին ազատ տնտեսական գոտու ստեղծումը և այլն: 

Վարչապետը խոսեց 2017թ-ի հունվար-փետրվարին նախորդ տարվա նույն ժամանակահատվածի համեմատությամբ  հանրապետությունում արձանագրված տնտեսական ակտիվության ցուցանիշի 6.2 տոկոս աճին՝ միաժամանակ նշելով, որ աճ գրանցվել է արդյունաբերության, գյուղատնտեսության, խմիչքների արտադրության, ՏՏ, ոսկերչության ոլորտներում: 

«Հիմա կհարցնեք, թե որտեղ են այդ թվերը, եթե մեր կյանքի որակը չի փոխվել: Բայց անտրամաբանականություն չկա։ Կանցնենք  մի ժամանակահատված և կհասնենք այն կետին, որից հետո որակական փոփոխություններ կլինեն»,- ընդգծեց վարչապետը:

Անդրադառնալով ներդրումային ծրագրերին՝ Կարեն Կարապետյանը հիշեցրեց, որ ընդհանուր առմամբ՝  նախատեսում են իրականացնել  3.2 միլիարդ դոլարի ներդրում, որից շուրջ 830-840 միլիոնն՝ այս տարի:

Նրա խոսքերով՝ Արագածոտնի մարզում 2017 թվականին նախատեսվում է 44 մլն դոլարի ներդրում:

«Այս ներդրումով մենք իրականացնելու ենք 23 ծրագիր, բացելու ենք մինչև 1000 աշխատատեղ: Իհարկե, դա բավարար չէ, որպեսզի լուծենք մեր առջև դրված բոլոր խնդիրները, բայց սա ստաբիլացման սկիզբն է:  Մենք այս բոլոր ծրագրերն այս տարի իրականություն ենք դարձնելու: Ավելին՝ կառավարությունը «թափ» է հավաքել, և եթե շարունակի աշխատանքը, ապա ընտրություններից հետո մեր կարգախոսը լինելու է հետևյալը՝  ամեն օր մի բան փոխել, մի բան լավացնել»,-ասաց Կարեն Կարապետյանը:

Վարչապետը նշեց, որ ներկայացրել են համալիր ծրագիր, որը հավակնոտ ու  համարձակ է, պրագմատիկ և ռացիոնալ է:

«Մենք ունենք նպատակասլացություն և կամք այն իրագործելու համար: Կարող եք հետաքրքրվել, թե վերջին 20-30 տարվա ընթացքում, որ երկրներն են, որոնք փոխել են իրենց կյանքը՝ ունենալով ոչ պակաս խնդիրներ, քան մենք: Ի՞նչ են իրենք կարողացել անել, որ մենք չենք կարող անել, ինչի՞  մենք թասիբի չենք ընկնում, որ իրականում կարող ենք ունենալ ֆանտաստիկ երկիր: Դրա համար կարծում եմ, որ մեր ծրագիրը մրցակիցների ծրագրերից տարբերվում է ոչ լոզունգային ձևակերպումներով, կոնկրետ թիրախներով և հորիզոններով, ինչպես նաև՝ բանաձևով, թե ինչպես ենք դա անելու և ուր ենք գնալու»,- նշեց Կարեն Կարապետյանը:

Վերջում նա ընտրողներին կոչ արեց ապրիլի 2-ին գնալ ընտրության, իսկ մինչ այդ բոլոր ծրագրերին ծանոթանան, որպեսզի հասկանան, թե ում են ընտրելու. «Ես առաջարկություն ունեմ: Եթե Դուք այդ ծրագրերը նայելուց հետո որոշեք, որ Ձեր ձայնը տալու եք մեր ռեյտինգային թեկնածուներին, ՀՀԿ-ին, ապա ինչպես այս վեց ամիսը պարբերաբար հաշվետվություն ենք տվել, նորից գալու ենք և Ձեր առաջ պատասխան ենք տալու: Ձեզ լավ տրամադրություն»: