Ձեր վստահելի աղբյուրը

Երևանի Կենտրոն և Նորք- Մարաշ վարչական շրջանների ընդհանուր իրավասության դատարանը  Արցախի պաշտպանության բանակի նախկին հրամանատար Սամվել Բաբայանին 2 ամսով կալանավորելու որոշում է ընդունել քիչ առաջ: Սամբել Բաբայանի փաստաբան  Ավետիս Քալաշյանը Panorama.am-ին ասաց, որ դատարանի որոշումն անպայման բողոքարկելու է:

Հարցին, թե ի՞նչ մեղադրանք է առաջադրվել Ս.Բաբայանին, նա նշեց, որ այդ մասին վաղն ամբողջական տեղեկատվության կտրամադրի, միաժամանակ հավելեց, որ առաջադրված մեղադրանքն անհիմն է:

Նշենք, որ Ս. Բաբայանը ձերբակալվել է մարտի 22-ին: ՀՀ Ազգային անվտանգության ծառայության հաղորդմամբ,  մաքսանենգ եղանակով Հայաստանի Հանրապետություն «Իգլա» տեսակի զենիթա-հրթիռային համալիր տեղափոխելու փաստի առթիվ հարուցված քրեական գործի շրջանակներում այս պահին ձերբակալված են 3 անձ, այդ թվում՝ ՀՀ քաղաքացի Սամվել Բաբայանը.  «Կատարված քննչական գործողությունների և օպերատիվ-հետախուզական միջոցառումների արդյունքում ստացվել են նաև արժանահավատ տվյալներ, որ նշված զենիթա-հրթիռային համալիրի բաղկացուցիչ մասերի ձեռքբերումը և փոխադրումն իրականացրած անձինք գործել են Սամվել Բաբայանի հետ ունեցած նախնական համաձայնությամբ և նրա պատվերով»։