Ձեր վստահելի աղբյուրը

Այսօր «ՓՄՁ ներդրումներ» ՈՒՎԿ-ում կկազմակերպվել էր դասընթաց  Գյուղատնտեսության աջակցության մարզային կենտրոնների և ՓՄՁ  ԶԱԿ մարզային մասնաճյուղերի աշխատակիցների համար` հանրապետությունում գյուղատնտեսական տեխնիկայի ֆինանսական վարձակալության` լիզինգի պետական աջակցության ծրագրին  դիմելու պայմանները ներկայացնելու նպատակով,- այս մասին հայտնում են գյուղնախարարության մամուլի ծառայությունից։

«Որպեսզի ծրագրի շահառուներին զերծ պահենք ավելորդ քաշքշուկներից և ծախսերից, նախատեսվել է հայտերի հավաքագրումներն իրականացնել Փոքր և միջին ձեռնարկատիրության զարգացման ազգային կենտրոնների մասնաճյուղերի և  գյուղատնտեսության աջակցության մարզային կենտրոնների միջոցով, որոնք ներկայացված են բոլոր մարզերում: Այսօրվա միջոցառումը նպատակ ունի Ձեզ ներկայացնել ծրագրի մանրամասները և  ընթացակարգային հարցերը, որպեսզի Դուք տեղերում իրազեկեք գյուղացիներին, պատշաճ խորհրդատվություն տրամադրեք, գործընթացը սահուն կազմակերպվի, և ծրագիրն առավելագույնս հաջող ընթանա»,- նշել է գյուղատնտեսության նախարարի տեղակալ Ռոբերտ Մակարյանը:

ՀՀ գյուղատնտեսության փոխնախարարը հավելել է, որ ծրագրի վերաբերյալ շահառուները կարող են տեղեկություններ ստանալ նաև նախարարության կայքէջից, ԳԱՄԿ-երի կողմից հրատարակվող թերթերից և համայնքապետարաններից:

«ՓՄՁ ներդրումներ» ՈՒՎԿ ՓԲԸ -ի գործադիր տնօրեն  Արթուր Բադալյանն իր հերթին նշել է, որ գործընթացն օպերատիվ  կազմակերպելու համար ներգրավվել են ԳԱՄԿ-երն ու ՓՄՁ  ԶԱԿ մարզային մասնաճյուղերը` ընդգծելով, որ սա ընդհանուր աշխատանք  է և ակնկալում է սերտ համագործակցություն: