Ձեր վստահելի աղբյուրը

Եվրոպական հեռարձակողների միությունը (ԵՀՄ) հայտարարել է, որ փորձելու է հասնել նրան, որպեսզի Ռուսաստանի ներկայացուցիչ Յուլյա Սամոյլովան մասնակցի «Եվրատեսիլ-2017» երգի միջազգային մրցույթին:

«Մեզ համար նախընտրելի լուծումն այն է, որ ռուս երգչուհին ելույթ ունենա Կիևում: Մենք շարունակում ենք աշխատել, որպեսզի հասնենք դրան»,- Լենռա.ռու-ի հաղորդմամբ՝ հայտարարել է ԵՀՄ ներկայացուցիչ Դևիդ Գուդմանը:

Նա հավելել է, որ ուկրաինական իշխանությունների հետ կապի մեջ են, ամեն ինչ անում են, ինչ հնարավոր է:

Հիշեցնենք, որ Ուկրաինայի անվտանգության ծառայությունը 3 տարով արգելել է ռուս երգչուհի Յուլիա Սամոյլովայի մուտքը այդ երկրի տարածք։ Արգելիք պատճառով նա չի կարող գնալ Կիև՝ մասնակցելու «Եվրատեսիլ-2017»-ին:

Մրցույթն այս տարի կանցկացվի մայիսի 9-ին, 11-ին և 13-ին Կիևում:  Ընդհանուր առմամբ, «Եվրատեսիլ-2017»-ին կմասնակցի 43 պետություն: Երգի միջազգային մրցույթին Հայաստանը կներկայացնի Առաջին ալիքի «Դեպի եվրատեսիլ» մրցույթի հաղթող Արծվիկը:

Ռուսաստանը, ամենայն հավանականությամբ, չի հեռարձակի Եվրատեսիլը։