Ձեր վստահելի աղբյուրը

«Եթե նույնսիկ ընտրություններին մասնակցող կուսակցությունները պասիվ են, ապա հեռուստաընկերություններն ընկնում են քաղաքական ուժերի հետևից, որպեսզի պահպանեն հավասարությունը: Դա նկատելի է բոլոր հեռուստաընկերությունների պարագայում, դրական երևույթ է»: Լրագրողների հետ հանդիպմանն այսօր ներկայացնելով հեռարձակվող լրատվամիջոցների մշտադիտարկման արդյունքները, ասաց Երևանի մամուլի ակումբի ղեկավար Բորիս Նավասարդյանը:

Մոնիտորինգի խումբն  ԵԽ-ի ու ԵՄ-ի համատեղ ծրագրի շրջանակում ուսումնասիրել է միայն հեռարձակվող լրատվամիջոցները, որոնց վերաբերյալ օրենսդրական կարգավորումներ են գործում:

Նախապես պլանավորել են հեռարձակվող 10 լրատվամիջոցների մշտադիտարկում, սակայն ԵԱՀԿ ծրագրերի սառեցման  հետևանքով դրանց թիվը կրճատվել է՝ դառնալով 5:

Մոնիտորինգը կատարել են երկու ժամանակահատվածի համար՝ փետրվարի 15-ից մարտի 4-ը և քարոզարշավի պաշտոնական մեկնարկի երկու շաբաթները:

«Օրենսդրական որևէ կարգավորում առաջին ժամանակահատվածի համար բալանսավորված լուսաբանման համար չկա, սակայն քաղաքացիների ընտրության վրա կարող են ազդեցություն ունենալ նաև այդ ընթացքում արված լուսաբանումները: Մենք առաջարկել ենք, որ կարգավորումները տարածվեն նաև այդ ժամանակաշրջանի վրա, սակայն չեն ընդունել»,-ասաց Նավասարդյանը:

Նրա կարծիքով, 27 օրը բավարար չէ բալանսավորված տեղեկատվություն ապահովելու համար:
Նավասարդյանը նշեց, որ երկու շաբաթվա մշտադիտարկման արդյունքների հիման վրա դժվար է վերջնական  գնահատական տալ, ընտրություններում վերջին երկու շաբաթում բալանսն ամբողջությամբ կարող է փոխվել: Ապրիլի 4-ին կներկայացվեն մշտադիտարկման վերջնական արդյունքները:

Մոնիտորինգի իրականացման ընթացքում մեթոդաբանության առումով որոշակի դժվարություններ եղել են վարչապետ  Կարեն Կարապետյանի լուսաբանման հետ:

«Առաջին անգամ ընտրությունների պատմության մեջ ՀՀԿ-ական բարձր պաշտոններ զբաղեցնող երկու անձինք ընդգրկված չեն ցուցակներում: Վարչապետը ամենակարևոր ուժն է քարոզչության առումով»,-ասաց նա

Որոշվել է, կառավարության նիստը վարող վարչապետի լուսաբանումը չի համարվում ՀՀԿ-ի լուսաբանում, իսկ եթե վարչապետը քարոզչական հանդիպումներ է ունենում, կամ հանդիպումներ, որտեղ երևում է ՀՀԿ լոգոն, ապա դրանք համարվում են ՀՀԿ-ի լուսաբանում:

«Եթե նա լիներ ցուցակի առաջին երեք համարներից որևէ մեկը, առնչություն ունենար, ապա դա կհամարեինք ՀՀԿ լուսաբանում»,-բացատրեց ակումբի նախագահը:

Մշտադիտարկման արդյունքում իրավական հետևանքներ չունեցող մի խախտում են արձանագրել, դա պայմանավորում են հեռուստաընկերությունների ֆինանսական միջոցների սղությամբ:  Այս քարոզչության ընթացքում ավելի հաճախ է պատահում, քան երբևէ. «Խոսքն այն մասին է, որ նույն տեսանյութը օգտագործում են մի քանի հեռուստաընկերություններ: Կան սյուժեներ, որոնք կրկնվում էին չորս ալիքով: Դա կարող էր տարբեր տևողություններ ունենալ, բայց պարզ էր, որ նկարվել է նույն օպերատորի կողմից, ինչը ցանկալի չէ, քանի որ քողարկված գովազդի դրսևորումներ կան»։

Նախորդ ընտրությունների համեմատ այս անգամ դժվարություններ է ներկայացնում նաև տարածքային ցուցակներում ընդգրկված թեկնածուների լուսաբանումը, չկան հստակ օրենսդրական կարգավորումներ:

«Այստեղ պայքարն անձանց մեջ է, ոչ միայն այլ կուսակցությունների ներկայացուցիչների միջև, այլև ներկուսակցական պայքար է ընթանում: Քանի որ օրենքով կարգավորված չէ, թեկնածուները շատ են, խնդիրներ են առաջանում»,-ասաց Նավասարդյանը:

Մոնիտորինգի արդյունքները ներկայացնող Նավասարդյանը բարձրաձայնեց էթիկայի խախտման մասին, որն առավել շատ հանդիպել է փետրվարի 15-ից մարտի 4-ն ընկած հատվածում, ինչը պայմանավորված է հեռուստաընկերություններից մի քանիսի կուսակցական լինելով: Պաշտոնական քարոզչության ընթացքում այդ խախտումները չեն եղել:

«Մենք այս ընթացքում հինգ հեռուստաընկերությունների կողմից գրանցել ենք էթիկայի 31 խախտում, որից 21-ը «Կենտրոն» հեռուստաընկերությունն է արել: «Ծառուկյան» դաշինքի մասին դրական հիշատակումների առյուծի բաժինը հենց այդ հեռուստաընկերությանն է: Եթերի կուսակցականացման երևույթը, ցավոք սրտի, դեռ կա»,-ասաց նա, ավելացնելով, որ «Կենտրոն» ու «Երկիր Մեդիա» հեռուստաընկերություններն ավելի վաղ են սկսել քարոզչությունը: