Ձեր վստահելի աղբյուրը

«Մեր նորագույն պատմության մեջ բազմաթիվ ընտրություններ են եղել, երբեք այսքան շուտ ընտրատեղամասից դուրս, այսքան մասսայական, բացահայտ ընտրակեղծիքներ չեն եղել»,-լրագրողների հետ հանդիպմանն ասաց «Օհանյան-Րաֆֆի-Օսկանյան» դաշինքի համապետական ցուցակով առաջադրված պատգամավորության թեկնածու (3-րդ համար), ՀՀ արտաքին գործերի նախկին նախարար Վարդան Օսկանյանը:

Նրա խոսքով, իրենց  դաշինքը, հիմնվելով «Իրազեկ քաղաքացիների» ՀԿ փաստերի վրա, դիմել է ԿԸՀ՝ ՀՀԿ մասնակցությունն այս ընտրություններին չեղյալ համարելու համար:

Վ. Օսկանյանը նշեց, որ իր համար Gallup International Association-ի հայաստանյան ներկայացուցչության նման կազմակերպություն գոյությունի չունի, կեղծ թվեր են դրվում շրջանառության մեջ:

«Մեր դաշինքի կողմից պատվիրվել է հարցում: Արդարացի հարցումներ են եղել: Կազմակերպության հետ պայմանավորվածության կա, որ թվեր չենք հայտարարելու: Բայց ՀՀԿ-ն շատ ցածր ռեյտինգ ունի: Բացահայտ առավելությամբ առաջին տեղում է «Ծառուկյան» դաշինքը: Մենք այդ բոլորի մեջ ունենք բավական ծանրակշիռ տեղ, որը մեր ժողովրդին պետք է հույս տա, որ ապրիլի 2-ից հետո մեր դաշինքի և ընտրությունների արդյունքներում առաջին տեղը գրաված դաշինքի միջև խորքային համագործակցության ռեալ հնարավորության կա»:

Հարցին, եթե ընտրություններից արդյունքներով չգրացվի ծանրակշիռ ձայներ, պատրա՞ստ եք հետընտրական զարգացումներին, ինչպե՞ս, Վ. Օսկանյանը պատասխանեց. «Մենք կենտրոնանում ենք ընտրությունների վրա, կարծում ենք, որ ընտրություններով հնարավոր է իշխանափոխություն անել,  վստահ ենք, որ դա լինելու է: Բայց եթե դա չեղավ, կարծում եմ՝ ժողովուրդն արդեն մեզ կթելադրի ինչ անել: Եթե ժողովուրդը որոշեց դուրս գալ, բողոքարկել, հավատացեք, որ կլինենք ժողովրդի կողքին»:

Դաշինքով առաջադրված պատգամավորության թեկնածու, «Ժառանգություն» կուսակցության նախագահ Րաֆֆի Հովհաննիսյանն ասաց, որ շարքային քաղաքացին այսօր պետք է հասկանա, որ իր ձեռքում է  երկրի ապագան:

«Եթե ինքն ուզում է քաղաքական բանտարկյալների ազատ արձակում, իշխանություների վերջնական փոփոխություն, ապրի այն երկրում, որտեղ տնօրենները, ուսուցիչները որպես լծակ, գործիք չեն օգտագործվում, հնարավորություն ունի կատարել գաղտնի քվեարկություն»,- ասաց նա:

Ր. Հովհաննիսյանը պատասխանելով հարցին, թե լուրեր են շրջանառվում, որ հեռանալու եք քաղաքականությունից, նույնիսկ երկրից, դրանով է պայմանավորված, որ փորձում եք վերականգնել ձեր ԱՄՆ քաղաքացիությունը, նա ասաց. «Ճշմարիտ չէ, որ հեռանում եմ երկրից կամ քաղաքականությունից, կամ փորձում եմ վերականգնել իմ քաղաքացիությունը: Հավանաբար, քաղաքական նպատակ է հետապնդում»: