Ձեր վստահելի աղբյուրը

«Մենք չենք կարող խնդիրը լուծել, մենք փորձում ենք հաշտեցնել, ստեղծել նախապայմաններ, որ խնդրում ներգրավված առաջնորդները կարողանան վերջնական լուծում կայացնեն, որից կշահեն տարածաշրջանի բոլոր ժողովուրդները»,- Երևանում լրագրողների հետ հանդիպմանն ասաց ԵԱՀԿ Մինսկի խմբի ամերիկացի համանախագահ Ռիչարդ Հոգլանդը:

Նրա խոսքով,  համանախագահների ամեծամեծ խնդիրն է շարունակել միջնորդական ջանքերը, հանդիպում են երկրների ԱԳ նախարարների, նախագահների հետ, լրագրողների, քաղհասարակութան, գործարարների հետ, լսում են, փորձում են գտնել ընդհանուր եզրեր, ճանապարհ, որով կարող են առաջ շարժվել:

«Հավաստիացնում եմ, որ սերտորեն աշխատում եմ մյուս երկու համանախագահների հետ, միասին ժամերով նստում ենք, խոսում ենք բոլոր մանրամասների մասին, մեր միջև տարաձայնություններ, սուր տարաձայնություններ  չկան: Նույնը նաև վերաբերում է մեր երկրների իշխանություններին: Նույնիսկ եթե մեր երկրների  միջև այլ հարցերի շուրջ տարաձայնություններ կան, այս այն հարցն է, որի շուրջ մենք շատ լավ կարողանում ենք միասին աշխատել, ինչի համար շատ հպարտ եմ»:

Նա նաև ասաց, որ ԱՄՆ-ն ունի նոր նախագահական վարչակազմ Վաշինգտոնում, այս պահի դրությամբ իրենց   քաղաքականությունը մնում է անփոփոխ,  ամբողջովին հավատարիմ են  համանախագահների գործընթացին,  պատրաստ են աշխատել բոլոր  կողմերի հետ գտնելու այնպիս լուծում, որը կհանգեցնի խաղաղության:

Հարցին, թե քաղաքագետների գնահատմամբ, ղարաբաղյան կարգավորման հարցը փակուղի է մտել, ԵԱՀՄ ՄԽ համանախագահն ասաց. «Ես չէի ցանկանա այս պահին օգտագործել փակուղի բառը:   Մենք գիտենք, որ բանակցային գործընթացը, իրոք, շատ դանդաղել է, չափից դուրս դանդաղել է, դրա համար ասում ենք, որ այժմ ժամանակն է վերադառնալ բանակցային սեղանի շուրջ: 

Նույնիսկ եթե մարդիկ խոսում են պատերազմի մասին, վատթարագույն լուծումն է, լուծում չէ: Բոլորի համար անհրաժեշտ է, որպեսզի լինի լուծում, որը կապահովի խաղաղություն, բարեկեցություն»: 

Նա չհամաձայնվեց, որ Մինսկի խմբի համանախագահների ոչ հասցեական հայտարարությունները թույլ են տալիս, որ բռնություններ տեղի ունենան. «Չեմ համաձայնվի, որ ապրիլյան պատերազմը համանախագահների կողմից արված հայտարարությունների կամ այդ հայտարարությունների բացակայության պատճառով էր: Դուք տեսնում եք մի մակարդակը: Մեկ այլ մակարդակում ևս կան աշխատանքներ: Չեմ կարծում, որ հայտարարությունները կարող էին խթանել պատերազմը»:
Խոսելով մարտի 11-ին Բաքվում համանախագահների ունեցած հանդիպումների մասին,  նա նշեց, որ չի կարող ասել, թե ինչ են քննարկել, բայց հավաստիացրեց.  «Մենք, անշուշտ, խոսել ենք Վիեննայում, Սանկտ Պետերբուրգում ձեռք բերված համաձայնությունների մասին: Մենք լիովին հավատացած ենք, որ  վստահության ձևավորմանն ուղղված միջոցները  դեռևս իրենց արժեքը, արդիականությունը պահպանում են, ցանկանում ենք, որ դրանք իրականացվեն: Մենք պետք է փորձենք ապահովել այն պայմանները, որ առաջնորդները նորից միմյանց հետ նստեն, խոսեն այս հարցերի մասին, որովհետև սա է միակ ողջամիտ  ճանապարհը որպեսզի հնարավոր լինի առաջ շարժվել: Բռնության ճանապարհով, պատերազմի միջոցով դա չի կարող լինել: Ազգային, քաղաքական  պատճառներով երբեմն այս կամ այն առաջնորդը կարող է խոսել բռնության, պատերազմի մասին: Մյուս  կողմն էլ կարող է ասել՝ մենք էլ ենք պայքարելու, անպատասխան չենք թողնելու: Բայց ուզում եմ ասել, որ դրանք  պետք է լինեն միայն բառեր, երբեք չդառնան գործողություն: Հիմա փորձում ենք ձևավորել այն պայմանները, որպեսզի հնարավոր լինել խոսել, գտնել լուծման իրական ճանապարհ»:

Ինչ վերաբերում է հարցին, թե հակամարտության կարգավորման վերջնաժամկետ կա՞, հնարավո՞ր է Մինսկի խումբն ինչ-որ պահի պարտադրի որևէ լուծում, համանախագահն ասաց. «Երբեք նման ժամկետ չի եղել: Համանախագահները  երբևէ որևէ լուծում չեն պարտադրի: Դա մեր աշխատանքը չէ: Մեր աշխատանք է խոսել  բոլոր խաղացողների հետ, կողմերի հետ, խրախուսենք, որպեսզի նրանք վերադառնան բանակցային սեղանի շուրջ: Այդ լուծումն իրենք ենք գտնելու»: