Ծառուկյանը փշաքաղվել է ներդրումների խոստումից
«Մարդիկ հավատացել են մեզ, սպասում են, մենք տեսնում ենք ժողովրդի անվերապահ վստահությունը, նրանք սպասում են մի լույսի: Մեզ սպասում են, քարից էլ լինես, չես կարող անդունդի եզրին գտնվող քաղաքացուն չօգնել»,-մարզահամերգային համալիրում հրավիրած հավաքում հայտարարեց «Ծառուկյան» դաշինքի ընտրական ցուցակը գլխավորող Գագիկ Ծառուկյանը՝ ամփոփելով Հայաստանի տարբեր բնակավայրերում ունեցած հանդիպումները:
Նա հիշեցրեց, որ եվրոպացի փորձագետներ է հրավիրել, ուսումնասիրել են իրենց ծրագիրը, առաջնահերթ 15 կետերը, ողջունել են:
«Հիացած ողջունեցին ինձ, իմ թիմին այդ մարդասիրական, հայրենասիրական ծրագրի համար: Տեսնելով ժողովրդի անվերապահ աջակցությունը, հիացած գնացին: Ես կարող եմ մի լավ լուր էլ ասել, որ փշաքավում եմ: Տեսնելով, որ մենք հաղթելու ենք, իմ գործընկերները այս 5 օրվա մեջ զանգահարել են, ասել են, պատրաստ ենք 15 մլրդ դոլարի ներդրում կատարել Հայաստանում: Ես, իրոք, փշաքաղվել եմ: Ես չեմ դիմել, որ դիմեմ, շատ ընկերներ ունեմ աշխարհում: Բայց դա գալիս է իմ պահվածքից, հզորությունից, իմ հարգանքից, իմ ճիշտ պահվածքից: Ես հասկանում եմ, որ ճիշտ եմ ապրել, իմ ժողովրդի պատիվն աշխարհում բարձր եմ պահել»,-ասաց նա:
Ծառուկյանն ասաց, որ քարոզարշավի ընթացքում որևէ սուտ չի ասել, խոսել է այն մասին, ինչը կարող է անել:
«Ես իմ թիմին տեղյակ եմ պահել, որ որևիցե մեկը ցեխ չշպրտի մրցակիցների վրա, այլ հանդիպենք ժողովրդին, լսենք նրանց խնդիրները, տեղյակ պահենք մեր անելիքների մասին: Ցեխ շպրտել չի կարելի, և մենք դա պահել-պահպանել ենք»,-ասաց նա:
Դաշինքի առաջնորդը հանդիպումների արդյունքում ընդհանրացրել է, որ ժողովուրդն անդունդի եզրին է, բոլորը ցանկանում են մի բան՝ պրոբլեմները լուծվեն:
«Հույսով, հավատով սպասում են, որ մի լավ լուր լսեն: Սիրելի ժողովուրդ ջան, անպայման մենք պատրաստ ենք դա անել: Մարդը եթե հարգանքով մարդ է, ունևոր, կայացած մարդ է, ունի ժողովրդի վստահությունը, հետևողական պետք է լինի: Ցանկացած ղեկավար իր ժողովրդին պետք է սիրի, արդարացի լինի»,-ասաց նա:
Նա ասաց, որ Հայաստանում իր թիմը թշնամի չունի, բայց նախանձողներն են շատ:
«Մեր ուզածը թշնամանքը չէ, մեր ուզածը համակարգ փոխելն է, օրենք փոխելն է: Ցանկացած պրոբլեմ լուծում ունի, դրա համար պետք է արդյունավետություն, հետևողականություն: Լավ աշխատողին պարգևատրել, վատին՝ հեռացնել: Դա մեր սկզբունքն է ցանկացած կոլեկտիվում»,-ասաց նա:
Նա նշեց, որ Հայաստանը բարեկամ երկրներ ունի, սակայն ժողովրդի բարեկեցության ապահովումը երկրի ներսում պետք է անեն:
«Ամեն ինչն էլ հնարավոր է անել: Ով ասում է՝ հնարավոր չունի, ուրեմն կյանքում ինքնուրույն ոչինչ չի արել, պատահական հաջողություններ է ունեցել»,-ասաց նա:
Ծառուկյանը շնորհակալություն հայտնեց իր թիմին, կուսակիցներին իրենց կատարած աշխատանքի համար:
«Բոլորը մի մարդու պես կազմակերպել են, համախմբվել են, ներկայացրել են, եղել է ցուրտ, թե անձրև: Ամեն ինչ կայացրել ենք շատ բարձր մակարդակով: Դա մենք պետք է հարյուրապատկենք»,-ասաց նա:
Նրա խոսքով, կարևոր աշխատանքը դեռ առջևում է, քվեարկության ընթացքին պետք է հետևողականորեն հետևեն:
«Մրցույթը երկու հոգու մեջ չէ, ինը ուժ է պայքարում յուրաքանչյուր ձայնի համար: Մեզ ուրիշի ձայները պետք չեն, մենք մեր ձայների տերն ենք, պահելու ենք, պահպանենք, ժողովրդի հույսերն իրականություն դարձնենք»,-ելույթն ավարտեց Ծառուկյանը:
Լրահոս
Տեսանյութեր
Աշխարհի առաջնությունից առաջ ինձ «подножка տվեց» Սիմոն Մարտիրոսյանը. Փաշիկ Ալավերդյան
