Ձեր վստահելի աղբյուրը

Մեծ Բրիտանիայի վարչապետ Թերեզա Մեյը ստորագրել է նամակը, որով Եվրամիության իշխանություններին ծանուցվում Է ԵՄ-ից` երկրի դուրս գալու ընթացակարգի պաշտոնական գործարկման մասին, գրում է «Լենտա.ռու»-ն՝ հղում անելով Reuters-ին:

Ծանուցագիրը Միացյալ Թագավորության մշտական ներկայացուցիչ Թիմ Բարոուի կողմից Եվրախորհրդի նախագահ Դոնալդ Տուսկին կհանձնվի մարտի 29-ին տեղական ժամանակով ժամը 11:30-ին (Երևանի ժամանակով ժամը 15:30-ին):

Միաժամանակ Մեյը ծանուցման մասին պետք է իրազեկի բրիտանական խորհրդարանին: Մեծ Բրիտանիայի իշխանությունները երաշխավորում են երկրում ապրող Եվրամիության քաղաքացիների իրավունքները:

«Երբ ես հաջորդ ամիսներին նստեմ բանակցությունների սեղանի շուրջ, կներկայացնեմ բոլոր նրանց շահերը, ովքեր ապրում են Բրիտանիայում՝ պատանիների ու տարեցների, հարուստների ու աղքատների, քաղաքացիների ու գյուղացիների շահերը և, իհարկե, ԵՄ-ի այն քաղաքացիների, որոնց համար մեր երկիրը տուն է դարձել», - մեջբերել է գործակալությունը Մեյի ճառից։