Ձեր վստահելի աղբյուրը

«Անցած տարվա ապրիլին տեղի ունեցածը ողբերգական էր:  Կային  բաղադրիչներ, որոնք ուղղված էին միջազգային համայնքի հանձնառության ու ցանկության գլխատմանը, այսինքն՝ նպատակներից մեկն էր միջազգային համայնքին հեռվացնել այս  գործընթացից: Մենք դրա փորձերը տեսել ենք նաև  Վիեննայում և Սանկտ Պետերբուրգում»,- «Մեդիա կենտրոնում» կայացած «Ապրիլյան պատերազմից մեկ տարի անց. գնահատականներ բանակցային գործընթացին» թեմայով քննարկմանն տեսազանգի միջոցով ասաց  Միջազգային ճգնաժամային խմբի՝ Եվրոպայի և Կենտրոնական Ասիայի ծրագրերի ղեկավար Մագդալենա Գրոնոն:

Նրա խոսքով, տեսնում է մի իրավիճակ, որտեղ վստահության  բացակայությունը հանգեցնում է այնպիսի իրավիճակի, որտեղ պարզ չէ, թե ով պետք է առաջին քայլն անի:

«Տեսնում ենք ամբողջ գործընթացում վստահության բացակայություն։ Վստահության  ամրապնդմանն ուղղված միջոցներ նախաձեռնում են, բայց հիմնավոր քննարկման համար այլևս հարթակներ չկան: Կարծես թե երկու կողմից էլ դա փաստել են: Մյուս կողմից կարևոր կլինի փորձել թափ հաղորդել գործընթացին»,- նշեց նա:

Մագդալենա Գրոնոյի խոսքով, գործընթացն այս պահին այնպիսինն է, որ որևէ առաջընթացի հույսն ամբողջությամբ վերացել է: Միաժամանակ հավելեց, որ արդեն խոսվում է ԱԳ նախարարների մակարդակով հանդիպման, նախագահների հանդիպման նախապատրաստման մասին:

«Այդ քննարկումներում անհրաժեշտ են հենքեր ստեղծել հետագա առաջընթաց ապահովելու համար»,- ասաց նա՝ ընդգծելով, որ էսկալացիայի ռիսկը բարձր է: