Ձեր վստահելի աղբյուրը

Կոտայքի մարզում քարոզարշավի ժամանակ ՀՀ վարչապետ, ՀՀԿ առաջին փոխնախագահ Կարեն Կարապետյանը հանդիպեց  Գառնի համայնքի բնակիչների հետ, պատասխանեց գառնեցիների հարցերին:

Այստեղ ևս վարչապետը բնակիչներին հորդորեց մասնակցություն ունենալ իրենց համայնքների զարգացման  ծրագրերի մշակման աշխատանքներին:

«Մենք մտցրել ենք նոր մշակույթ, համայնքապետերին տվել ենք մեթոդաբանություն, ըստ որի, պետք է կազմել համայնքի զարգացման ծրագիր, քանի որ եթե չունես տեսլական՝ ուր ես գնում,  եթե ծրագիր չկա,  պատկերացում չկա, ապա համայնքապետը  գալու է մանր-մունր խնդիրներ լուծելու՝ մեծ պատկերը չունենալով, իսկ ծրագրով հնարավոր կլինի լուծել համայնքում առկա խնդիրները»,- ասաց վարչապետը:

Կարեն Կարապետյանի խոսքերով՝  նախ պետք է գույքագրել բոլոր պրոբլեմները, ներկայացնել գործազուրկների և աշխատանք ունեցողների թիվը, հաշվարկել  Գառնիի առավելությունները, ներկայացնել, թե ինչ պետք է անել աշխատատեղերի  ստեղծման համար և որոնք են լինելու համայնքապետի, մարզպետարանի և կառավարության անելիքները:

«Ես Երևանում ձեզանից լավ չեմ պատկերացնում, թե Գառնին ինչպես  է զարգանալու: Կարող է ձեր համայնքապետի ներկայացրած ծրագիրը սանրելու, բանտիկ կապելու, կարգավորելու խնդիր ունենա՝  ներդրողին ցույց տալու համար, բայց գաղափարն այստեղից պետք է չէ՞ դուրս գա: Այստեղի ժողովրդից լավ կա՞ մեկը, որն, օրինակ, պատկերացնի՝ ինչ է  պակասում Գառնիում: Եթե մենք այդ համակարգը չներդնենք, ապա չենք կարողանալու երկիրը զարգացնել: Բոլորը համայնքապետերը երևի առավոտից- գիշեր աշխատում են, բայց եթե դու չգիտես ուր ես գնում, դրա օգուտը չես տեսնում, ապա 4-5 տարին մեկ նորից հանդիպելու ենք, այս կամ այն խնդիրն ենք բարձրացնելու, քանի որ զարգացման հեռանկար չունենք»,- ընդգծեց վարչապետը՝ հավելելով, որ  համայնքապետը պետք է նաև օպերատիվ կառավարիչ լինի:

Գառնիի բնակիչներից մեկն էլ արձագանքեց,  թե ինչպես կարող են ծրագիր կազմել և ներկայացնել կառավարություն, եթե համայնքի ավագանի ընտրվում է խանութպանը, բենզին վաճառողը կամ հավաքարարը, վարչապետը պատասխանեց. «Այստեղ բոլորս անելիք ունենք, այդ թվում՝ դուք»:

Գառնեցիներից մեկն էլ դիմելով վարչապետին՝ ասաց, որ իրենք ճանապարհ չունեն, դրա համար իրենց երկաթգիծ է հարկավոր, Կարեն Կարապետյանն ասաց, որ  եթե  երբևիցե երկաթգիծ կառուցի դեպի Գառնի, նույն օրն իրեն պաշտոնից կազատեն:

«Երկաթգիծը պահանջում է ծավալ, սարսափելի փողեր, այլ խնդիր է, որ Գառնիի համար նորմալ ճանապարհ սարքենք»,- ասաց նա:

Կարեն Կարապետյանը նշեց նաև, որ կառավարությունը շահագրգռված է Գառնիում խթանելու տուրիզմի զարգացմանը: 

Բնակիչներից մեկն ասաց, որ Գառնիի զբոսաշրջության զարգացման ծրագիր են ներկայացրել կառավարություն,  մինչդեռ պատասխան այդպես էլ չեն ստացել:

«Իսկ դուք ակտի՞վ եք, կապվե՞լ եք իրենց հետ», - հետաքրքրվեց Կարեն Կարապետյանը:

Գառնեցին նշեց՝ այո, ավելին՝ իրեն խոստացել են պատասխանել, սակայն մեկ ամսվա ընթացքում ոչ մի արձագանք չի եղել:

«Եթե մեկ ամսվա մեջ ձեզ չեն պատասխանել, մենք կհետաքրքրվենք, բայց  եթե չեն պատասխանում, պատուհանից մտեք, պատուհանից չեն թողնո՞ւմ` «ֆորտոչկայից» մտեք: Ես չեմ ասում, որ դա դառնալու է խաղի կանոն: Մենք պետական ապարատում շատ բան ունենք փոխելու, մենք իրականում կհետևենք` ինչի՞ պատասխան չենք տվել, բայց դուք էլ հետևողական եղեք, եթե վստահ եք, որ ձեր ծրագիրը տրամաբանական է, լա՞վ», - ասաց Կարեն Կարապետյանը: