Ձեր վստահելի աղբյուրը

«Արցախում նախագահ Սերժ Սարգսյանի ելույթը գերագույն գլխավոր հրամանատարի, պետական ազգային գործչի ելույթ էր, մեսիջներն ուղղված էին արտաքին, ներքին լսարանին»,- լրագրողների հետ հանդիպման ժամանակ  ասաց  ԱԺ փոխնախագահ, ՀՀԿ մամուլի խոսնակ Էդուարդ Շարմազանովը:

Նրա խոսքով, արտաքին լսարանին ուղղված էր, որ այս մեկ տարում հայկական կողմը բավականին վերազինվել է, այսօր արդեն առաջնագիծն ավելի կազմակերպված է, վերազինված է, քան նախկինում:

«Հայաստանը՝ որպես Արցախի անվտանգության երաշխավոր և նրա գլխավոր հրամանատարը ջենք չեն խնայելու Արցախի անվտանգության ապահովման գործում, եթե դրա համար անհրաժեշտ լինի դիմել նույնիսկ «Իսկանդերի» պաշտպանությանը, մենք դա անելու ենք»,- նշեց Էդ. Շարմազանովը:

Նրա ներկայացմամբ, նախագահի ելույթի մյուս ուղերձերն էին՝ անհրաժեշտ է ներքին կայունություն, անվտանգությունը մնում է Հայաստանի համար կարևորագույն հիմնահարցերից մեկը:

«Առանց անվտանգության կայուն համակարգի, մենք չենք կարող խոսել ոչ տնտեսական զարգացման, ոչ սոցիալական բարեփոխումների մասին»,- ասաց  նա:

Պատասխանելով հարցին, թե «Ժառանգություն» կուսակցության առաջնորդ Րաֆֆի Հովհաննիսյանն ասել էր, որ այս ելույթով նախագահ Սերժ Սարգսյանը շեշտում է, որ ինքն անփոխարինելի է, Շարմազանովը նշեց. «Այդ կարծիքին չեմ: Պատմությունն է  ցույց տալիս, ով է անփոխարինելի, ով՝ ոչ: Մի բանում պարոն Հովհաննիսյանի հետ համաձայնվեմ, որ լինում են անփոխարինելի գործիչներ: Ինքն անփոխարինելի է մի բանում՝ քաղաքական կապիտալը մսխելու գործում պարոն Հովհաննիսյանը չեմպիոն է, այդ իմաստով անփոխարինելի է: Դժվար է Հայաստանի քաղաքական երկնակամարում գտնել գործիչ, ով այդքան կարճ ժամանակահատվածում այդքան մեծ քաղաքական կապիտալ մսխեց»:

Ինչ վերաբերում է ՀՀ առաջին նախագահ Լևոն Տեր-Պետրոսյանի նախօրեին տված հարցազրույցում հնչեցրած հայտարարություններին ղարաբաղյան հիմնախնդրի կարգավորման վերաբերյալ, ՀՀԿ  խոսնակն ասաց. «Իշխանության կարծիքը ղարաբաղյան հիմնահարցի վերաբերյալ շատ պարզ է: Առնվազն 2008 թվականից այս կողմ չի եղել ամիս, շաբաթ, որի մասին նախագահը կամ արտաքին գործերի նախարարը, մեր գործընկերները չխոսեն: Մեր կարծիքը չի փոխվել: Նախընտրական մեր ծրագրում մենք մի քանի հստակ կետով խոսել ենք ղարաբաղյան կարգավորման մասին:

Բնականաբար, փոխզիջումներ պետք են: Իհարկե: Բայց փոխզիջումների մասին պետք է խոսենք այն ժամանակ, երբ Ադրբեջանը պատրաստ կլինի գնալ փոխզիջումների: Առաջին նախագահի կարծիքը 1990-ականներից հետո չի էլ փոխվել: Ինձ համար զարմանալի է այն քաղաքական գործիչների  կարծիքն  առ առաջին նախագահ, ովքեր 2008 թվականին ծափահարում էին Տեր-Պետրոսյանին, այսօր քննադատում են հենց նույն արցախյան հարցով»:

Դիտարկմանը, թե ՀՀԿ-ի վարչապետ Կարեն Կարապետյանը հայտարարում է  3,2 միլիարդ դոլարի ներդրում  բերելու մասին, իսկ նախօրեին «Ծառուկյան» դաշինքի առաջնորդ Գագիկ Ծառուկյանը հայտարարեց, որ իր եվրոպացի գործընկերի հետ 15 միլիարդ դոլարի ներդրում է բերելու  Հայաստան, Էդ. Շարմազանովն ասաց. «Ինչ ասեմ, եթե մերը 5 միլիարդ է, իրենց 15 միլիարդ… Հիշեցի Ջիվանուն՝ մեր բլուրը իր բարձր սարին վնաս չէ: Աստված տա Հայաստանում ներդրումները շատանան: Թող բոլորը բերեն: Իմ ցանկությունն է, որ անկախ ընտրությունների արդյունքներից, խթանեն Հայաստանում ներդրումների իրականացմանը»:

ՀՀԿ մամուլի խոսնակը նաև ասաց. «Այս նախընտրական քարոզչությունը, գոնե այսօր,  արձանագրում է, որ ՀՀԿ-ն առաջամարտիկն է քաղաքական մարաթոնի: Այս տեմպով ճիշտ աշխատելու դեպքում, կարծում եմ, մեր ժողովուրդը ՀՀԿ-ին հնարավորություն կտա կամ միայնակ, կամ կոալիցիոն գործընկերների հետ միասին կազմելու ապագա կառավարությունը: Ես դա տեսնում եմ»: