Ձեր վստահելի աղբյուրը

Ամերիկացի երաժիշտ Բոբ Դիլանը, ով անցյալ տարվա հոկտեմբերին պարգևատրվել էր գրականության Նոբելյան մրցանակով, առաջիկա հանգստյան օրերին կժամանի Շվեդիա և կստանա պարգևը, գրում է «Ինտերֆքաս»-ը՝ հղում անելով BBC-ին:

Դիլանն ինքը ներկա չի եղել մրցանակի հանձնման արարողությանը: Նա նաև դեռևս չի կարդացել ավանդական դասախոսությունը, ինչը պայման է 910 հազար ԱՄՆ-ի դոլարի չափով պարգևի դրամական բաղադրիչն ստանալու համար։ Դիլանն այն պետք է կարդա մինչև հունիսի 10-ը:

Շվեդական ակադեմիայի հաղորդագրության համաձայն` ամենայն հավանականությամբ,երգիչը ոչ թե անձամբ կկարդա դասախոսությունը, այլ այն կուղարկի տեսագրությամբ:

Նշվում Է, որ Դիլանն անձամբ հանդիպում կունենա ակադեմիայի անդամների հետ և կվերցնի անվանական դիպլոմն ու մեդալը:

«Դա համեստ արարողություն կլինի՝ առանց լրատվամիջոցների, որին կմասնակցեն միայն Դիլանը և ակադեմիայի ներկայացուցիչները»,- իր բլոգում գրել է ակադեմիայի մշտական քարտուղար Սառա Դանիուսը։

Բացի այդ, այս հանգստյան օրերին Բոբ Դիլանը երկու համերգ կտա Շվեդիայի մայրաքաղաքում։