Ձեր վստահելի աղբյուրը

Ազատության հրապարակում մեկնարկել է Կոնգրես-ՀԺԿ դաշինքի նախընտրական հանրահավաքը, որին հաջորդելու է խաղաղության երթ:

«Այսօր ասելու ենք միայն դրական բաներ, միայն լավ բաներ, ոգևորող բաներ: Ոչ մեկի այգին քար չենք ուզում գցել, որովհետև մենք ուրախ ենք,  որ Հայաստանում կա կամք, ուժ, սեր, պայքար ունեցող հարյուր հազարավոր մարտիկներ, ովքեր ազատության սիրահար են»,- հայտարարեց դաշինքի պատգամավորության թեկնածու Արամ Մանուկյանը:

Նա նշեց, որ հանրահավաքից հետո կազմակերպելու են խաղաղության երթ՝  առաջին անգամ 30 տարվա իրենց պայքարի մեջ:

«Այսօր շատ ասելիք չկա,  որովհետև Լևոն Տեր-Պետրոսյանի երեկվա ելույթից հետո ուղղակի ոչինչ ասել հնարավոր չէ»,- ասաց Արամ Մանուկյանը:

Իր ելույթում ԱԺ ՀԱԿ խմբակցության ղեկավար, դաշինքի պատգամավորության թեկնածու Լևոն Զուրաբյանը նշեց, որ մեկ տարի առաջ մի փոքր հեղափոխություն արեցին, որը դեռևս անտեսանելի է:

«4+4+4 ֆորմատով մենք, իհարկե, միջազգային հանրության օգնությամբ, պարտադրեցինք այս իշխանություններին ընտրությունների օրինականության վերահսկման մի շարք մեխանիզմներ:  Շնորհիվ դրանց՝ ընտրատեղամասերում ընտրակեղծարարություն ընդհանրապես հնարավոր չի լինի անել:

Այսօր մեր երկրի ճակատագիրը գտնվում է մեր ժողովրդի ձեռքերում: Ժողովուրդն ապրիլի 2-ին  կարող է իր քվեարկությամբ կատարել հեղափոխություն մեր երկրում: Կոչ եմ անում ժողովրդին՝  եկեք ապրիլի 2-ին կատարենք այդ հեղափոխությունը»,- ասաց նա: