Ձեր վստահելի աղբյուրը

«Իմ նպատակն է ոչ թե պարզապես պատգամավորի կարգավիճակ ձեռք բերել, այլ իմ նպատակն է  առաջիկա հինգ տարիներին աշխատելով՝ հասնել եզդիական համայնքի առջև ծառացած խնդիրների լուծմանը»,- եզդիական համայնքի ուսանողների հետ հանդիպմանն ասաց խորհրդարանական ընտրություններին ՀՀԿ-ի համապետական ցուցակով եզդիական  համայնքի կողմից առաջադրված թեկնածու, սահմանադրական իրավունքի մասնագետ Ռուստամ Մախմուդյանը:

Նա նշեց,  որ որոշեց համագործակցել, կանգնել այնպիսի քաղաքական ուժի կողքին, որի օգնությամբ կարող են հասնել առկա խնդիրների լուծմանը:

«ՀՀԿ-ի  հետ կկարողանանք  բարձրացնել մեզ  հուզող խնդիրները լուծելու իրատեսականությունը: Վստահ եղեք, որ ՀՀԿ-ի հետ ճանապարհ անցնելով, եթե ոչ բոլոր, գոնե  համայնքի առջև ծառացած որոշ հարցերի լուծմանը  կարող ենք հասնել: Մենք շարունակելու ենք ունենալ խնդիրներ, բայց միասին աշխատելով՝ կհասնենք նաև այդ խնդիրների լուծմանը»,- ասաց Ռ. Մախմուդյանը:

Նրա խոսքով, խորհրդարանական գործընթացներում փոքրամասնություն կազմող քաղաքական ուժերը  հարցեր են բարձրացնում, սակայն լուծումների չեն հասնում:

«Մեծամասնություն կազմող քաղաքական ուժի հետ կարող ենք հասնել դրանց լուծմանը»,- ասաց պատգամավորության թեկնածուն՝ հավելելով, որ հետևելով նախընտրական գործընթացներին, շփվելով հասարակության հետ, վստահ է, որ ՀՀԿ-ն մեծամասնություն կկազմի նաև առաջիկա խորհրդարանում: 

Նա նշեց, որ անցած ընտրություններին  ընդգրկված է եղել ԲՀԿ համամասնական ցուցակում՝ համայնքի առաջարկությամբ, սակայն հետագայում համայնքը եկել է համոզման և կոչ է արել իրեն՝ ներկայացվել այն ուժի ցուցակում, որի հետ հնարավոր կլինի  ապագայում հասնել խնդիրների լուծմանը:

Ռ. Մախմուդյանի խոսքով,  նախընտրական քարոզարշավի ընթացքում հանդիպել է չորս մարզի՝ Արմավիր, Արագածոտն, Արարատ, Կոտայք, 50-60 համայնքի եզդիների հետ, ծանոթանել խնդիրներին:

«Մեր հայրենակիցների կողմից բարձրացված հիմնական հարցերը համապետական նշանակություն ունեն, առավել շատ խոսվում է  սոցիալական խնդիրների մասին: Այսինքն՝ չպետք է այդ խնդիրները դիտարկել ազգային խտրականության հողի վրա: Դրանք, ինչպես նշեցի, պետության առջև ծառացած խնդիրներ են, որոնց լուծման ուղիները ներառված են ՀՀԿ ծրագրում»,- ասաց նա:

Եզդիական համայնքի ներկայացուցչի խոսքով, Հայաստանում բնակվող եզդիներին բացի սոցիալական խնդիրներից, նաև հետաքրքրում է եզդիների ցեղասպանության ճանաչման հարցն՝ օրենքի մակարդակով:  Նա նշեց, որ այդ ուղղությամբ ինքն աշխատելու է: 

Ինչ վերաբերում է  այսօր Հայաստանում վարվող պաշտպանական քաղաքականությունը՝  հաշվի առնելով, որ եզդի երիտասարդները ծառայում են Զինված ուժերում, մասնակցել են ապրիլյան պատերազմին, պատգամավորության թեկնածուն ասաց, որ նախարար Վիգեն Սարգսյանի ղեկավարությունը նոր լիցք, որակ է հաղորդել այս ոլորտին:

«Իհարկե, չպետք է փորձենք անտեսել նախորդներին, յուրաքանչյուրն իր արժանի լուման ունի բանակի կայացման, հզորացման գործում: Այս պահին պաշտպանական քաղաքականության առումով որևէ բացասական շեղումներ չեն նկատվում»,- ասաց նա:

Ռ. Մախմուդյանը ներկաներին տեղեկացրեց, որ սահմանադրական փոփոխություններն են հնարավորություն տվել ազգային փոքրամասնություններին Ազգային ժողովում անպայման ունենալ իրենց ներկայացուցիչները:

«25 տարվա բաղձալի երազանքն իրականացավ: Սակայն պետք է միասին խորհրդարան գործուղենք այնպիսի մարդու, ով  կներկայացնի մեր շահերը»,- նշեց նա՝ հավելելով, որ բացի իրենից, եզդիական համայնքից ևս երեք թեկնածու է ընդգրկված ՀՀԿ ցուցակում՝ Ռզգան Շամոյան, Խդր Հաջոյան, Ամո Շարոյան:

«Խնդրում եմ՝ ապրիլի 2-ին եղեք ակտիվ, մասնակցեք ընտրություններին, ձեր ձայնը տվեք «Հայաստանի Հանրապետական» կուսակցությանը»,- ասաց նա:

Խոսելով նախընտրական քարոզարշավի մասին, պատգամավորության թեկնածուն  նշեց, որ տարբերվում է անցած  բոլոր նախընտրական  գործընթացներից, շատ  հավասարակշռված է՝ չհաշված որոշ մարդկանց ամբիցիաները, անցնում է փոխըմբռնման մթնոլորտում: